उत्तर प्रदेश,गोवा,मणिपूरमध्ये राष्ट्रवादीचे उमेदवार -पवार
मुंबई | प्रतिनिधी |
राष्ट्रवादी काँग्रेस 3 राज्यात विधानसभा निवडणूक लढवणार असून, उत्तर प्रदेश, गोवा आणि मणिपूर या राज्यांचा यामध्ये समावेश आहे.या निवडणुकीच्या निमित्ताने आपण लवकरच उत्तर प्रदेशचा दौरा करणार असल्याचे राष्ट्रवादीचे सर्वेसर्वा शरद पवार यांनी मंगळवारी जाहीर केले.तसेच उत्तर प्रदेशात समाजवादी पक्षाशी आम्ही आघाडी करणार असल्याचेही त्यांनी सुचित केले.
पवार यांनी मुंबईत पत्रकार परिषद घेतली. या पत्रकार परिषदेत शरद पवारांनी आगामी पाच राज्यांच्या निवडणुकांवर भाष्य केले आहे. उत्तरप्रदेशात भाजपचे सरकार हटवण्याची गरज आहे. उत्तरप्रदेशात परिवर्तन होणार असून नागरिकांना बदल हवा आहे. याकरिता सिराज मेहंदी यांचा राष्ट्रवादीत प्रवेश झाला आहे. येत्या दिवसात त्यांचे अनेक सहयोगी राष्ट्रवादीत येणार आहेत. असेही शरद पवार म्हणाले.
उत्तरप्रदेशात राष्ट्रवादी काँग्रेस आणि समाजवादी पार्टी एकत्र निवडणूक लढणार आहे. निवडणुकीच्या पार्श्वभूमीवर लवकरच उत्तरप्रदेशात जाणार असल्याचंही यावेळी शरद पवारांनी सांगितलं आहे. तसेच एकत्र बैठकीत जागा वाटप धोरण ठरणार आहे.
शरद पवार,राष्ट्रवादी अध्यक्ष
मणिपूरमध्ये पाच जागांवर राष्ट्रवादी काँग्रेस पक्ष निवडणूक लढणार आहे. मणिपूर राज्यात काँग्रेससोबत बोलणी सुरू आहे. तसेच गोव्यातही काँग्रेस पक्षासोबत आणि तृणमूल काँग्रेस पक्षांसोबत चर्चा सुरू आहे. गोव्यात परिवर्तन करण्याची आवश्यकता आहे. भाजपचे गोव्यातून सरकार हटवण्याची गरज आहे. येत्या दोन दिवसांत आघाडीचा निर्णय होईल असेही शरद पवार म्हणाले.