ट्रॅक्टरला एसटी बसची जोरदार धडक; एक ठार

बसचालकासह 21 प्रवासी जखमी

। जळगाव । प्रतिनिधी ।

जळगाव जिल्ह्यामध्ये ट्रॅक्टर आणि बसचा भीषण अपघात झाला आहे. बसने उभ्या असलेल्या ट्रॅक्टरला पाठीमागून जोरदार धडक दिली. या अपघातात एकाचा मृत्यू झाला असून चालकासह 21 प्रवासी जखमी झाले आहेत.

जळगाव ते शिरपूर बस धरणगाव येथून चोपडा येथे जात असताना पिंपळे फाट्याजवळ रस्त्यावर उभ्या असलेल्या उसाच्या ट्रॅक्टरला मागून धडकली. हा अपघात शनिवारी (दि. 14) सकाळी 6 च्या सुमारास घडला. या अपघातात कामराज शरद सोनवणे यांचा मृत्यू झाला तर, चालकासह 21 प्रवासी गंभीर जखमी झाले आहेत. जखमींना तातडीने धरणगाव येथील ग्रामीण रुग्णालयात उपचारासाठी दाखल करण्यात आले. यातील बसचालकाची प्रकृती चिंताजनक असल्याची माहिती मिळत आहे. अपघाताची माहिती मिळताच धरणगाव पोलीस घटनास्थळी हजर होऊन त्यांनी अपघातामुळे विस्कळीत झालेली वाहतूक सुरळीत केली.