नापास झाल्याचा राग…; विद्यार्थ्याकडून शिक्षकावर चाकूने हल्ला

। छत्रपती संभाजीनगर । प्रतिनिधी ।

छत्रपती संभाजीनगरमधील एका शाळेत धक्कादायक घटना समोर आली आहे. टीसी घेण्यासाठी आलेल्या अल्पवयीन विद्यार्थ्याने दोन वर्षांपूर्वी नापास झाल्याचा राग मनात धरून आपल्या माजी वर्गशिक्षकावर चाकूने हल्ला केला. या हल्ल्यात शिक्षक गंभीर जखमी झाले. पोलिसांनी विद्यार्थ्याला ताब्यात घेतले आहे. तसेच, हल्ल्यात वापरलेला चाकू जप्त केला आहे.

ही घटना छत्रपती संभाजीनगर शहरातील छावणी भागात असलेल्या नामांकित लिटल फ्लॉवर या शाळेत मंगळवारी (दि.1) सकाळी घडली. टीसी घेण्यासाठी एक विद्यार्थी शाळेत आला आणि थेट मुख्याध्यापिका स्वर्णलता मेनेकांती यांच्या दालनात पोहोचला. तेथे त्याचे माजी वर्गशिक्षक विशाल धूशिंग हेही होते. सुरुवातीला चर्चा सुरु झाली, मात्र क्षणांतच त्याचे रूपांतर वादात झाले. मुख्याध्यापिका आणि शिक्षक विद्यार्थ्याची समजूत काढण्याचा प्रयत्न करत होते. परंतु, जवळपास अर्धा तास सुरू असलेल्या या वादानंतर परिस्थिती अचानक हाताबाहेर गेली. विद्यार्थ्याच्या मनात दोन वर्षांपासून साचलेला राग उफाळून आला. वाद संपताच वर्गशिक्षक दालनाबाहेर पडत असतांना विद्यार्थ्याने अचानक चाकू बाहेर काढला आणि त्यांच्यावर हल्ला केला. शिक्षकांना वाचवण्यासाठी धावलेल्या एका व्यक्तीलाही त्याने चाकूचा धाक दाखवत मागे हटवले.

या हल्ल्यात शिक्षक गंभीर जखमी झाले. त्यांना तातडीने रुग्णालयात दाखल करण्यात आले असून त्यांच्यावर उपचार सुरु आहेत. या घटनेनंतर पोलिसांनी अल्पवयीन विद्यार्थ्याला ताब्यात घेतले. तसेच, या हल्ल्यात वापरलेला चाकू जप्त केला असून या प्रकरणाचा अधिक तपास सुरु आहे.

2023 मध्ये हा विद्यार्थी लिटल फ्लॉवर शाळेत नववीत शिकत होता. विशाल धूशिंग हे त्याचे वर्गशिक्षक होते. नववीत तो विज्ञान आणि गणितात नापास झाला. धूशिंग यांनीच आपल्याला नापास केले असा त्याचा समज होता. मात्र, धूशिंगने मराठी आणि हिंदी विषय शिकवत असल्याने त्याचा नापास करण्याचा काहीही संबंध नव्हता. परंतु तेव्हाही त्याचा धूशिंग यांच्याशी वाद झाला होता. धूशिंग यांना धडा शिकवण्याच्या इराद्यानेच तो मंगळवारी टीसी घेण्यासाठी शाळेत आला होता. त्यासाठी त्याने ऑनलाईन चाकूही मागवला होता, अशी माहितीही प्राथमिक तपासात समोर आली आहे.