सुनीता विल्यम्स यांची अंतराळ मोहीम रद्द

| नवी दिल्ली | वृत्तसंस्था |

भारतीय वंशाच्या अंतराळवीर सुनीता विल्यम्स पुन्हा अंतराळात जाण्यासाठी सज्ज झाल्या होत्या. बोईंगच्या स्टारलाइनर अंतराळयानातून मंगळवारी सुनीता विल्यम्स आणि बुच विल्मोर हे नासाचे अनुभवी अंतराळवीर अंतराळात जाणार होते. मात्र, ही मोहीम रद्द झाली आहे. सुनीता विल्यम्स यांची ही तिसरी अंतराळ मोहीम ठरली असती.

सुनीता विल्यम्स बुच विल्मोर यांच्यासह अंतराळ मोहिमेसाठी बोइंग स्टारलाइनरने अंतराळात झेपावणार होत्या. मात्र, लाँचिंगच्या काही तास आधी तांत्रिक बिघाड झाला. ज्यामुळे ही मोहीम रद्द करण्यात आली आहे. आता ही मोहीम पुन्हा कधी राबवली जाईल याबाबत तारीख जाहीर करण्यात आलेली नाही. सुनीता विल्यम्स तिसर्‍यांदा अंतराळात झेपावणार होत्या. मात्र, ही मोहीम रद्द झाली आहे. याआधी सुनीता विल्यम्स 2006 आणि 2012 या वर्षांमध्ये अंतराळ मोहिमेवर गेल्या होत्या. सुनीता विल्यम्स यांनी अंतराळातल्या मोहिमेचे 322 दिवस पूर्ण केले आहेत. भारतीय प्रमाणवेळेनुसार मंगळवारी सकाळी 8.04 वाजता फ्लोरिडातील केप कॅनाव्हरलच्या स्पेस लॉन्च कॉम्प्लेक्स-41 वरून अ‍ॅलटस व्ही प्रक्षेपकांवर स्टारलाइनर अंतराळयान प्रक्षेपित केले जाणार होते. या यानातून सुनिता विल्यम्स आणि विल्मोर अंतराळात झेपावणार होते.