हिंदुस्थान-पाकिस्तान लढतीला क्रिकेटप्रेमींचा तुफान प्रतिसाद
। दुबई । वृत्तसंस्था ।
ओमान व यूएई येथे 17 ऑक्टोबर ते 14 नोव्हेंबर या कालावधीत आयोजित करण्यात येणार्या टी-20 वर्ल्ड कपमधील लढतींच्या तिकीट विक्रीला सुरुवात झाली असून 24 ऑक्टोबरला दुबई येथे खेळवण्यात येणार्या हिंदुस्थान-पाकिस्तान या पारंपरिक प्रतिस्पर्ध्यांमधील लढतीला क्रिकेटप्रेमींचा तुफान प्रतिसाद मिळत आहे. यूएई व ओमान सरकारकडून स्टेडियममध्ये 70 टक्के क्रिकेटप्रेमींना परवानगी देण्यात आल्यामुळे आता हिंदुस्थानच्या सर्व लढतींसाठी तिकीट खिडकीवर तसेच ऑनलाइन झुंबड उडाली आहे.
टी-20 वर्ल्ड कप यूएई व ओमान येथे आयोजित करण्यात आला असला तरी या स्पर्धेचे आयोजक बीसीसीआय आहे. बीसीसीआय व आयसीसी यांनी मिळून यूएई सरकारकडे स्टेडियममध्ये प्रेक्षकांना परवानगी देण्यात यावी अशी मागणी केली होती. आता ही मागणी मान्य झाल्यामुळे टी-20 वर्ल्ड कपच्या बहुतांशी लढती हाऊसफुल्ल होतील यात शंका नाही.
हिंदुस्थान-पाकिस्तान या हायव्होल्टेज लढतीसाठी क्रिकेटप्रेमींची झुंबड उडाली आहे. या स्पर्धेतील लढतींसाठी कमीतकमी तिकिटाचे दर सहाशे रुपये ठेवण्यात आले आहेत. पण हिंदुस्थान-पाकिस्तान यांच्यामधील लढतीसाठी क्रिकेट फॅन्स एका तिकिटासाठी लाखो रुपये मोजताना दिसत आहेत. एक तिकीट 333 अधिक टक्क्यांनी विकले जात आहे. या लढतीसाठी महाग तिकीट दोन लाख रूपयांपर्यंतचे आहे.