ठकसेनाने केली बिल्डरची फसवणूक

| पनवेल | वार्ताहर |

कोपरखैरणेत राहणार्‍या ठकसेनाने वाशीतील बांधकाम व्यावसायिकासोबत बनावट कागदपत्रांच्या आधारे नेरुळ एमआयडीसीतील 1300 चौरस मीटरचा प्लॉट विक्रीचा व्यवहार करुन त्यांच्याकडून तब्बल 38 लाख रुपये उकळल्याचा प्रकार उघडकीस आला आहे.

विशेष म्हणजे, या ठकसेनाने ‘एमआयडीसी’चे सीईओ यांच्या नावाने बनावट बँक खाते उघडून त्यात 33 लाखांचा पे-ऑर्डर वटवून सदर रकमेचा अपहार केल्याचे उघडकीस आले आहे. वाशी पोलिसांनी या भामट्याविरोधात बनावटगिरी करुन फसवणूक केल्याप्रकरणी गुन्हा दाखल केला आहे. या प्रकरणातील तक्रारदार गीत अरुण चंदा (34) या वाशी, सेक्टर- 8 मध्ये राहण्यास असून त्या बांधकाम व्यवसायात आहेत. ऑक्टोबर 2022 मध्ये कोपरखैरणेत राहणार्‍या संतोष बबन पाटील या ठकसेनाने गीत चंदा यांची एका मध्यस्थाच्या मदतीने भेट घेतली होती. त्यावेळी त्याने नेरुळ एमआयडीसीतील 1300 चौरस मीटरचा प्लॉट त्याला अलॉट झाल्याचे सांगून एमआयडीसीच्या सही-शिक्क्याचे त्याच्या नावाचे पत्र त्यांना दाखविले. त्यामुळे चंदा यांनी त्याच्यावर विश्‍वास ठेवून सदरची जमीन विकत घेण्याचा निर्णय घेतला. त्यानंतर त्यांच्यात 6 कोटी 50 लाख रुपयांमध्ये सदर जमीन खरेदी-विक्रीचा व्यवहार ठरल्यानंतर चंदा यांनी संतोष पाटील याला 5 लाख रुपये रोख तसेच ‘एमआयडीसी’च्या नावाने 33 लाख 10 हजार रुपयांचा पे ऑर्डर दिला.

यादरम्यान, चंदा यांनी एमआयडीसीत जाऊन सदर जमिनीबाबत माहिती काढली असता संतोष पाटील याने चंदा यांना दिलेले एमआयडीसीचे अलॉटमेंट लेटर तसेच एमआयडीसीत पैसे भरल्याची त्याने दिलेली पावती बनावट असल्याचे त्यांना सांगण्यात आले. त्यामुळे चंदा यांनी एमआयडीसीच्या नावाने 33 लाख 10 हजार रुपयांचा दिलेला पे ऑर्डर कुठल्या बँकेत वटवण्यात आला, याबाबत माहिती त्यांनी काढली. त्यात संतोष पाटील याने एमआयडीसीचे सीईओ यांच्या नावाने कोपरखैरणेतील अपना सहकारी मल्टी स्टेट शेड्युल्ड बँकेत बनावट खाते उघडल्याचे तसेच त्या खात्यात सदर पे-ऑर्डर वटवून 33 लाखांची रक्कम काढून घेतल्याचे आढळून आले. संतोष पाटील याने केलेल्या फसवणुकीनंतर गीत चंदा यांनी संतोष पाटील याच्याकडे आपले पैसे परत मागितले असता, त्याने चंदा यांना 20 लाख आणि 18 लाख 10 हजार रुपयांचे दोन चेक दिले. मात्र, सदर चेक खात्यात पैसे नसल्यामुळे वटले नाहीत. त्यानंतरदेखील संतोष पाटील याने गीत चंदा यांना त्यांचे पैसे देण्याचे आश्‍वासन देऊन वेळ मारुन नेली. मात्र, त्याने चंदा यांना आजपर्यंत पैसे परत केले नाहीत. अखेर गीत चंदा यांनी वाशी पोलीस ठाण्यात संतोष पाटील याच्याविरोधात तक्रार दाखल केली.