बारामतीची पोटनिवडणूक बिनविरोध नाही

| बारामती | प्रतिनिधी |

अजित पवार यांच्या निधनानंतर बारामती विधानसभेची जागा रिक्त झाली आहे. त्यामुळे निवडणूक आयोगाने या जागेसाठी पोटनिवडणुकीची घोषणा केली आहे. राज्यातील बारामती आणि राहुरी विधानसभेसाठी होणाऱ्या पोटनिवडणुकीसाठी 23 एप्रिलला मतदान होणार असून, 4 मे रोजी मतमोजणी होणार आहे. बारामती विधानसभेची पोटनिवडणूक बिनविरोध करण्याचे प्रयत्न सुरू असताना आता ओबीसी नेते लक्ष्मण हाके यांनी बारामतीत उमेदवार देणार असल्याची माहिती दिली आहे.

बारामती विधानसभा पोटनिवडणुकीबाबत बोलताना लक्ष्मण हाके यांनी म्हटले की, आम्ही बारामती विधानसभा पोटनिवडणूक लढणार आहोत. अनेक पक्ष आमच्या संपर्कात आहेत. यामध्ये काही राष्ट्रीय पक्षसुद्धा निवडणूक लढवण्यासाठी इच्छुक आहेत. अनेक पक्षांशी चर्चा सुरू आहेत. काहीही झालं तरी बारामतीची निवडणूक लढणार आहोत.

पुढे बोलताना लक्ष्मण हाके म्हणाले की, महाराष्ट्रात याआधी अनेक वेळा एखाद्या नेत्याच निधन झालं तर त्या ठिकाणी निवडणुका झालेल्या आहेत. रमेश वांजळे यांचे निधन झाल्यानंतर पोटनिवडणुकीत भाजपाने त्या ठिकाणी उमेदवारी देऊन निवडणूक जिंकली आहे. पिंपरी चिंचवडचे नेते लक्ष्मण जगताप यांच्या उमेदवाराच्या विरोधात अजित पवार यांनी उमेदवार उभा केला होता. त्यामुळे अशा प्रसंगाचे कारण सांगून निवडणुका बिनविरोध व्हायला लागल्या तर ते लोकशाहीसाठी घातक आहे.

लक्ष्मण हाके पुढे बोलताना म्हणाले की, दादांच्या सहानुभूतीवर सुनेत्रा पवारांना तिसऱ्या दिवशी उपमुख्यमंत्रीपद दिले आहे. हजारो कोटींच्या घोटाळ्याचे आरोप असणाऱ्या पार्थ पवार यांना बिनविरोध राज्यसभेवर पाठवले आहे. शरद पवार यांनाही बिनविरोध राज्यसभेवर पाठवलेल आहे. सुनेत्रा पवार यांना बिनविरोध विधान परिषदेवर घेण्यात यावं आणि भाजपा सत्ताधाऱ्यांनी त्यांचा एक कार्यकर्ता निवडणुकीला उभा करावा, असंही हाके यांनी सांगितले.