भडवळ-ममदापूर-नेरळ रस्ता धोकादायक

प्रवासासाठी ठरतोय जीवघेणा
महापुरात अनेक ठिकाणी रस्ता नादुरुस्त
ग्रामस्थांकडून स्थानिक आमदारांना निवेदन
नेरळ | वार्ताहर |
कर्जत तालुक्यातील नेरळ गावापासून जाणार्‍या कल्याण-कर्जत राज्यमार्गापासून निघणार्‍या नेरळ-ममदापूर-भडवळ रस्त्याची अवस्था दयनीय झाली आहे. या तीन किलोमीटर लांबीच्या रस्त्याच्या दुतर्फा जागोजागी महापुराच्या पाण्याने रस्ता नादुरुस्त होत पाणी जाण्याचा मार्ग बनला आहे. दरम्यान, स्थानिक ग्रामस्थांनी स्थानिक आमदारांना ग्रामस्थांच्या मागणीचे पत्र देऊन रस्ता नव्याने बनविण्याची मागणी केली आहे.
कर्जत-कल्याण राज्यमार्ग रस्त्याच्या ममदापूरकडे जाणारा रस्ता आहे. पूर्वी नेरळ रेल्वे स्टेशनसमोरील जुन्या पोस्ट ऑफिस येथून नेरळ-ममदापूर रस्ता सुरू होत होता. मात्र, नेरळ जुन्या पोस्ट ऑफिसपासून कल्याण-कर्जत राज्यमार्ग रस्त्यापर्यंतचा रस्ता सिमेंट काँक्रिटचा बनविला आहे. पुढे ममदापूर ग्रामपंचायत हद्द सुरू होते आणि हा रस्ता ममदापूर-भडवळ या दोन गावांना जोडला जातो. त्यातील ममदापूर ग्रामपंचायतीचा भाग हा नेरळ ममदापूर संकुल विकास प्राधिकरणमध्ये येतो. तर, ममदापूर नाल्यापासून पुढे भडवळ गावाची हद्द सुरू होते. पुढे हाच रस्ता दामत गावातून पुन्हा कर्जत-कल्याण राज्यमार्गाला जाऊन भेटतो. मात्र, हा ममदापुर हद्द ते भडवळ गावापर्यंतचा रस्ता चर्चेत आला आहे, तो त्या रस्त्याच्या दुरवस्थेमुळे. कल्याण रस्त्यापासून सुरू होणारा हा रस्ता खड्ड्यांनी सुरू होतो आणि भडवळ गावात संपतो तोदेखील खड्ड्यांमधूनच. त्यामुळे भडवळ गावातील असंख्य लोकांनी हा रस्ता वापरणे जवळपास बंद केले आहे. भडवळ गावातील वाहनचालक हे दामत रस्त्याने नेरळ किंवा शेलू रेल्वे स्थानक येथे जाण्यासाठी कल्याण-कर्जत राज्यमार्ग रस्त्याचा वापर करतात.
त्यामुळे भडवळ गावातील रहिवासी यांनी रस्त्याची नव्याने बांधणी करण्याची मागणी पुढे आली आहे. दामत भडवळ ग्रामपंचायत मधील ग्रामपंचायत सदस्य किशोर भोईर तसेच स्थानिक ग्रामस्थ भगवान जामघरे यांनी कर्जतचे आमदार महेंद्र थोरवे यांना निवेदन देऊन रस्त्याचे डांबरीकरण करण्याची मागणी केली आहे.

भडवळ गावाचा रस्ता अनेक वर्षे बनवला गेला नाही. दहा वर्षांपूर्वी भडवळ गावातून टाकाची वाडी येथे जाणारा रस्ता हा पंतप्रधान ग्रामसडक योजनेतून बनविला होता. त्यानंतर भडवळ आणि टाकाची वाडी रस्त्याची अवस्था दयनीय झाली आहे.
किशोर घारे, ग्रामपंचायत सदस्य
कल्याण रस्ता ते ममदापूर हद्दीतील रस्त्याचे काम नेरळ ममदापूर विकास संकुल प्राधिकरणच्या अखत्यारीत आहे. पुढे पुलापासून भडवळ गावाकडे जाणारा रस्ता खराब झाला आहे. मात्र, ममदापूर ग्रामपंचायतीमधील रस्त्याचे काम प्राधिकरणकडून प्रस्तावित आहे.
प्रल्हाद गोपणे, उपअभियंता, जि.प. बांधकाम विभाग