आ. जयंत पाटील, अनंत गीतेंची प्रमुख उपस्थिती
। अलिबाग । प्रतिनिधी ।
लोकसभा निवडणुकीच्या पार्श्‍वभूमीवर इंडिया आघाडीकडून उद्या शनिवार, (दि.13) एप्रिल रोजी सकाळी 11 वाजता अलिबाग तालुक्यातील पांडवादेवी येथील जय मंगल कार्यालय येथे तर दुपारी 3 वाजता चोंढी-आगरसुरे येथील राऊत मंगल कार्यालय, तसेच सायंकाळी 6 वाजता मुरुड तालुक्यातील बोर्लीमांडला येथे कार्यकर्ता मेळाव्याचे आयोजन करण्यात आले आहे. शेकापचे सरचिटणीस आ. जयंत पाटील, इंडिया आघाडीचे उमदेवार माजी केंद्रीय मंत्री अनंत गीते यावेळी कार्यकर्त्यांशी संवाद साधणार आहेत.
लोकसभा निवडणुकीच्या रिंगणात इंडिया आघाडीच्या वतीने अनंत गीते उभे राहिले आहेत. गेल्या अनेक दिवसांपासून जिल्ह्यातील अनेक भागात प्रचार सुरु आहे. या प्रचाराला कार्यकर्त्यांसह मतदारांकडून उत्स्फूर्त प्रतिसाद मिळत आहे.
इंडिया आघाडीच्या वतीने अलिबाग तालुक्यातील पांडवादेवी येथील जय मंगल कार्यालय येथे सकाळी अकरा वाजता कार्यकर्ता मेळावा होणार आहे. यावेळी शेकाप सरचिटणीस आ. जयंत पाटील, उमेदवार अनंत गीते कार्यकर्त्यांना संबोधित करणार आहेत. यावेळी शेतकरी कामगार पक्षासह इंडिया आघाडीचे हजारो कार्यकर्ते उपस्थित राहणार आहेत. त्यानंतर मुरुड तालुक्यातील आगरसुरे येथील राऊत मंगल कार्यालय व बोर्ली मांडला येथे मेळावा होणार आहे. या मेळाव्याला कार्यकर्त्यांनी मोठ्या संख्येने उपस्थित राहण्याचे आवाहन शेकाप जिल्हा चिटणीस अ‍ॅड. आस्वाद पाटील, उध्दव ठाकरे गटाचे तालुकाप्रमुख शंकर गुरव व इंडिया आघाडीच्या वतीने करण्यात आले आहे.