| पोलादपूर | वार्ताहर |
ग्रुपग्रामपंचायतीची ग्रामपंचायत आणि ग्रामपंचायतीची नगरपंचायत होऊनही पोलादपूर शहरामध्ये अजूनही सार्वजनिक व्यायामशाळा उभारण्याबाबत नगरपंचायत प्रशासन आणि सत्ताधाऱ्यांची अनास्था दिसून येत असल्याची तीव्र खंत वस्ताद गणपत जगताप यांना 84 वर्षी वाटत आहे.पोलादपूर तहसिलदार कार्यालयामध्ये सरकारी नोकरी करीत असताना गणपत जगताप यांनी व्यायामाच्या आवडीमुळे सिध्देश्वरमंदिरालगत सुरू केलेल्या व्यायामशाळेबाबत पोलादपूर शहरातील अनेक जुन्या व्यायामपटूंच्या आठवणी आजही ताज्या आहेत. मुंबईमध्ये व्यायामाची आवड निर्माण झाली. पुणे येथेही व्यायामशाळांमध्ये कसरत अंगमेहनत करून पोलादपूर येथे 1967 मध्ये तहसिल कार्यालयामध्ये नोकरीसाठी आल्याची आठवण सांगताना गणपत जगताप यांच्या डोळयांनी भुतकाळातील आठवणींना उजाळा देण्याचा प्रयत्न सुरू केला.
साधारणपणे 1971च्या दरम्यान जोगेश्वरी व्यायामशाळा गाडीतळावर सुरू केली. यानंतर पोलादपूरच्या शंकरमंदिरालगत म्हणजेच सिध्देश्वर मंदिरालगत व्यायाम शाळा सुरू केली. मुंबईतून या व्यायामशाळेसाठी व्यायामाचे सामान आणले. या व्यायामशाळेचे उदघाटन कापडे बुद्रुक येथील सीताराम दौलती सकपाळ या तत्कालीन सभापतींच्या हस्ते केले. यानंतर गाडीतळाच्या व्यायाम शाळेच्यावतीने लेझीम, दांडपट्टा, कबड्डी, खोखो, लांब उडी, दोरी उडी, सिंगलबार व डबल बारवरील कसरती, डम्बेल्स व गदा फिरवणे अशा विविध खेळांमध्ये विद्यार्थी व विद्यार्थिनींना तयार केले. मराठी शाळेच्या पटांगणामध्ये भैरवनाथनगरचा आखाडा आणि जोगेश्वरीनगरचा आखाडा अशा दोन मातब्बर आखाडयांमध्ये स्पर्धा व चुरस निर्माण झाली. त्यावेळीच्या गटविकास अधिकाऱ्यांनी आमचा जोगेश्वरी आखाडा अव्वल ठरल्याने पाचशे रूपये बक्षिस दिले; यावेळी गणपत जगताप यांच्या मार्गदर्शनाखाली मुलं खुप चांगली शिकतील, असा विश्वास व्यक्त करणाऱ्या बीडीओंमुळे गणपत जगताप यांना वस्ताद असे नांव मिळाले. यानंतर पोलादपूर शहरामध्ये केवळ मुलंच नाही तर शोभा बांदलसारखी महिलादेखील व्यायाम व लेझीमच्या माध्यमातून गणपतभाऊ जगताप यांचे शागीर्द म्हणून नावारूपाला आले. पोलादपूर तहसिलदार कार्यालयाबाहेर पुर्वी सामने होत असत. यावेळी आजूबाजूच्या गावांमधून अनेक खेळाडू संघ येत असल्याची आठवण गणपत जगताप यांनी व्यक्त केली.
यानंतर अविनाश पेंडसे, निवास शेठ तसेच गुजराती व्यापारी मंडळींच्या आर्थिक मदतीने वस्ताद गणपत जगताप यांनी व्यायामशाळेचे काम सुरू ठेवले. त्या काळी आर्थिक बाजू सांभाळणे हा व्यायामशाळेची देखभाल दुरुस्तीसाठी महत्वाचा भाग होता. सिद्धेश्वर आळीतील जोगेश्वरी व्यायाम शाळेनंतर पोलादपूर शहरामध्ये व्यायामाचे महत्व कमी झाले.1997 चा पूर आल्याने शंकरमंदिरालगतची व्यायामशाळा वाहून गेली आणि या सार्वजनिक व्यायामशाळेसाठी कोणीही सहकार्य करेनासे झाले.
अलिकडे, पोलादपूर शहरातील अत्याधुनिक व्यायामशाळा म्हणजेच जिम सर्वसामान्यांच्या मुलांना परवडेनासे असल्याने पुन्हा सुसज्ज व्यायामशाळा उभारण्यासाठी पोलादपूर नगरपंचायतीने पुढाकार घेण्याची गरज दिसून येत असल्याचे यावेळी वस्ताद गणपत जगताप यांना वाटत असून क्रिकेट हा विना व्यायामाइह खेळ नावारूपाला येत असल्याबद्दल वस्तादांनी तीव्र नाराजी व्यक्त केली आहे. पुन्हा कबड्डी, खो-खो, दांडपट्टा, लेझीम, मल्लखांब आदी खेळांसाठीची दमछाक निर्माण करण्याकामी सुदृढ तरुणांची फौज उभी राहण्यासाठी येत्या वर्ष दोन वर्षांमध्ये आपल्या हयातीतच प्रयत्न व्हावेत, अशी अपेक्षा वस्ताद गणपत जगताप यांनी प्रस्तुत प्रतिनिधीकडे व्यक्त केली. पत्नी, मुले यांच्यासह पोलादपूर शहरातील जोगेश्वरी गाडीतळ येथील लोकवस्तीमध्ये वास्तव्यास असलेल्या वस्ताद गणपत जगताप यांना वयोमानानुसार कानाने ऐकू येत नाही. मात्र, त्यांच्यामधील उमेद अद्याप कायम असल्याचे दिसून येत आहे.