प्रेम अजरामर करणारा ‘मजनू’ चित्रपट प्रेक्षकांच्या भेटीला

| पनवेल | प्रतिनिधी |
प्रेमाचे प्रश्‍न सोडविणारा ‘मजनू’ हा चित्रपट दहा जूनला प्रेक्षकांच्या भेटीला येत आहे. कोरोना महामारीच्या संकटात लॉक डाऊनच्या काळात नाशिक जिल्हयातील एका ग्रामीण भागात चित्रपटाचे चित्रीकरण करुन दोन वर्षात चित्रपट पूर्ण करण्याचे धाडस निर्माते, सहनिर्माते, कलाकार व त्यांच्या टीमने करुन दाखविले. 10 जूनला सर्वत्र ‘मजनू’ चित्रपट प्रदर्शित होत आहे. त्या निमित्ताने पनवेलमध्ये निर्माते, सहनिर्माते, सहकलाकारांनी येवून पत्रकार परिषदेमध्ये आपल्या चित्रपटाची माहिती पत्रकारांना दिली. त्यावेळी चित्रपटाचे लेखक आणि निर्माते गोवर्धन दोलताडे, सहनिर्माते इरफान भोपाली, दिग्दर्शक प्रकाश दोलताडे, अभिनेता रोहन पाटील, अभिनेत्री श्‍वेतलाना अहिरे, आदी उपस्थित होते. चित्रपटातील अनेक चित्रीकरणावर भाष्य करुन चित्रपटाची माहिती सांगण्यात आली.

‘मजनू’ म्हटला की, मुलीच्या मागे फिरणारा, प्रेमात अडसर आणणारा, एकतर्फी प्रेम करणारा असे समिकरण असते, मात्र हे सर्व मजनू चित्रपटात नसून त्याची कथा वेगळया धर्तीवर मांडण्याची कला पूर्ण टीमने जोपासली आहे. प्रेक्षकांना प्रेमाची परिभाषा काय असते? हे मजनू चित्रपटात पहायला मिळेल. प्रेक्षकांनी मग ती तरुण पिढी असेल किंवा ज्येष्ठ सर्वांनी हा चित्रपट पहायला हवा असेही मजनूच्या टीमकडून सांगण्यात आले. प्रेम हे ठरवून होत नसते, ते कळत नकळत होत असते. प्रेमाचा शिरकाव जीवनात वेगवेगळया प्रकारे होतो. प्रेमात वेगवेगळे प्रकार आहेत असे चित्रपट पाहिल्यावर प्रेक्षकांना समजेल, असे मजनू टीमकडून पत्रकार परिषदेत सांगण्यात आले. चित्रपटातील दृश्य उत्तमरित्या दाखविण्यात आले आहेत. चित्रपटात ग्रामीण भागातील भाषेवर प्रभुत्व साकारले असल्याचे पहायला मिळते. सर्व कलाकारांनी आपआपल्या परिने आपली भूमिका साकारली आहे. त्यातच विशेष कस्तुरी नावाचे पात्र चित्रपटात उल्लेखनीय भूमिका बजावल्याचे सांगण्यात आले. 10 जूनला सर्वत्र मजनू चित्रपट प्रदर्शित होत आहे. तो सर्वांनी पहावा असे आवाहनही ‘मजनू’ च्या सर्व टीमकडून करण्यात आले.