विल्यम लेग्नफोर्डचा रहस्यमयी मृत्यू

। मुंबई । प्रतिनिधी ।

मुंबई इंडियन्स आणि कोलकाता नाईट रायडर्स यांच्यातील आयपीएल सामना मुंबईच्या वानखेडे स्टेडियमवर खेळला गेला. या सामन्यात मुंबई इंडियन्सने 13 वर्षांचा जुना रेकॉर्ड मोडून विजय मिळवला. मात्र, या विजयानंतर एक धक्कादायक आणि गूढ घटना समोर आली आहे. मुंबई इंडियन्सच्या विजयानंतर दुसऱ्या दिवशी, म्हणजे सोमवारी (दि.30) मुंबईतील मरिन ड्राईव्ह परिसरातील पंचतारांकित ट्रायडन्ट हॉटेलमध्ये बीसीसीआयशी संबंधित एका व्यक्तीचा मृतदेह आढळून आला.

विल्यम लेग्नफोर्ड असे मृत व्यक्तीचे नाव असून, ते बीसीसीआयचे ब्रँड कास्ट इंजिनियर होते. आयपीएल सामन्यांच्या प्रसारणासाठी ते मुंबईत आले होते. ते 24 मार्चपासून ट्रायडन्ट हॉटेलच्या रूम नंबर 2715 मध्ये थांबले होते. 30 मार्च रोजी सकाळी रिसेप्शनिस्टने त्यांना फोन केला. परंतु, कोणताही प्रतिसाद मिळाला नाही. हॉटेल कर्मचाऱ्यांनी रूममध्ये जाऊनही उत्तर न मिळाल्याने मास्टर कीने रूम उघडली. आत गेल्यावर कर्मचाऱ्यांना धक्कादायक दृश्य दिसले. तातडीने बोलावलेल्या डॉक्टरांनी विल्यम लेग्नफोर्ड यांना मृत घोषित केले.

या प्रकरणाची नोंद मरिन ड्राईव्ह पोलीस स्टेशनमध्ये करण्यात आली असून, पोलिसांनी तपास सुरू केला आहे. मृत्यूचे नेमके कारण अद्याप स्पष्ट झालेले नाही.
वैद्यकीय अहवाल आणि पोस्टमॉर्टम रिपोर्टनंतर अधिक माहिती समोर येण्याची शक्यता आहे. मात्र या गूढ मृत्यूमुळे आयपीएल वर्तुळात खळबळ उडाली आहे.