काशिद समुद्र किनारी नववर्षाचे जल्लोषात स्वागत

| कोर्लई | प्रतिनिधी |

सरत्या वर्षाला निरोप देऊन नववर्षाच्या स्वागतासाठी पर्यटनात जगाच्या पटलावर नावारूपाला आलेल्या मुरुड तालुक्यातील काशिद समुद्र किनारा पर्यटकांनी फुलला. रस्त्यावर दुतर्फा वाहनांच्या लांबचलांब रांगा लागलेल्या दिसून आल्या. तर काही ठिकाणी ट्रॅफिक जॅमला सामोरे जावे लागले. पर्यटकांनी मौज-मजा-मस्ती करत आनंद लुटला आणि नववर्षाचे जल्लोषात स्वागत केले.

काशिद समुद्र किनारी भरतीच्या वेळेस फेसाळणारे पाणी, उसळणाऱ्या लाटा, किनाऱ्यावरील शुभ्र वाळू येथे पर्यटकांना आकर्षित करते. पर्यटकांच्या सोयी-सुविधा, याठिकाणी असलेली स्पीडबोट, पॅरासेलिंग बोट, बनाना, बंफर तसेच घोडा-उंटावरील सफर पर्यटनाचा आनंद द्विगुणीत करते. याठिकाणी विविध खाद्य-पेय, चहा-नाष्टा, सोयीसुविधा उपलब्ध आहेत. याठिकाणी दर शनिवार, रविवार तसेच सुटीच्या दिवशी मोठ्या प्रमाणावर पर्यटक भेट देत असतात. पर्यटकांच्या सुरक्षेसाठी लाईफ गार्ड, स्थानिक, स्टॉलधारक, ग्रामपंचायतचे सहकार्य लाभते. पोलीस ही आपली कामगिरी उत्तम प्रकारे पार पाडतात. ग्रामपंचायत तसेच डॉ. नानासाहेब धर्माधिकारी प्रतिष्ठान, श्रीसदस्य, विविध सामाजिक संस्था यांच्या माध्यमातून या ठिकाणी वेळोवेळी स्वच्छता अभियान राबविण्यात येत असल्याने समुद्र किनारा चकाचक करण्यात येतो. त्यामुळे सरत्या 2025 सालाला निरोप देण्यासाठी व सन 2026 चे स्वागत करण्यासाठी मुरुड तसेच काशिद समुद्र किनारा पर्यटकांनी फुलला होता. थर्टीफस्टसाठी लॉज बुकिंग फुल झाले असून समुद्र किनाऱ्यावर मौज, मजा मस्ती करत आनंद लुटला आणि नववर्षाचे जल्लोषात स्वागत केले. वाढत्या गर्दीमुळे काही काळ वाहतूक कोंडीही पाहायला मिळाली. लाईफगार्ड, पोलीस व ग्रामपंचायतीच्या सहकार्यामुळे पर्यटकांची सुरक्षितता राखण्यात आली होती.