तळा डम्पिंग ग्राऊंडचा प्रश्न सुटेना

| तळा | प्रतिनिधी |

तळा शहरातील डम्पिंग ग्राऊंडचा प्रश्न सुटता सुटत नसल्याचे चित्र पहायला मिळत असून, कित्येक वर्षांपासून डम्पिंगचे स्थलांतर होणार असल्याचे सांगितले जात आहे. मात्र, डम्पिंग ग्राऊंड स्थलांतराचे घोडे अडले तरी कोठे असा प्रश्न आता शहरातील नागरिकांकडून विचारला जात आहे.

तळा नगरपंचायतीने डम्पिंग ग्राऊंडची व्यवस्था मालकीच्या तळा धरणाजवळ केली आहे. शहरातील सर्व गोळा केलेला ओला व सुका कचरा एकत्रित या ठिकाणी टाकला जातो. मात्र, या डम्पिंग ग्राऊंड सभोवती संरक्षक भिंत न बांधल्यामुळे मोकाट गुरे, कुत्रे व पक्षांनी तो पसरला जात आहे. यामुळे या परिसरात सर्वत्र दुर्गंधी
पसरलेली असते जवळच तहसिल कार्यालय असल्याने जाणाऱ्या येणाऱ्या नागरिकांना या दुर्गंधीचा सामना करावा लागतो. तसेच डम्पिंग ग्राऊंड शेजारीच निम्म्या शहराला पाणी पुरवठा करण्यासाठी बोअरवेल मारण्यात आली आहे. डम्पिंग ग्राऊंडवर टाकलेला हा कचरा कुजून घाण पाणी जमिनीत मुरले जात आहे. त्यामुळे याचा परिणाम मानवी आरोग्यावर होण्याची शक्यता नाकारता येत नाही. या डम्पिंग ग्राऊंडचे स्थलांतर शहरातील आंबेळी येथे नगरपंचायतीच्या मालकी हक्क असलेल्या जागेत होणार असल्याचे नगरपंचायत प्रशासनाकडून सांगितले गेले होते. त्यानुसार त्या ठिकाणी काम ही पूर्ण करण्यात आले आहे. मात्र, त्या ठिकाणी डम्पिंगला राणेची वाडी व अंबेळी ग्रामस्थांच्या असलेल्या विरोधामुळे अद्यापही धरणा शेजारीच शहरातील कचरा टाकण्यात येत आहे. यामुळे तळा शहरातील कचऱ्याची समस्या बिकट होत चालली आहे.

डम्पिंग ग्राऊंड सध्या धरणाशेजारी असून ते अंबेळी येथे स्थलांतरित करण्यात येणार आहे. अंबेळी येथे नवीन डम्पिंग ग्राऊंडचे जवळपास 80 टक्के काम पूर्ण झाले असून उर्वरित काम लवकरात लवकर पूर्ण करून फेब्रुवारी अखेर पर्यंत शहरातील कचऱ्याचे अंबेळी येथे विघटन करण्यासाठी प्रयत्न सुरू आहेत.जुने डम्पिंग ग्राऊंड आहे तेथीलही संपूर्ण कचरा अंबेळी येथे हलविण्यात येणार असून कचऱ्याचे संपूर्ण विघटन याप्रमाणे काम चालणार आहे.

-मनिषा वजाळे,
मुख्याधिकारी