मावळत्या वर्षाने दिला लाखोंना निवारा

घरांची विक्रमी विक्री

| मुंबई | प्रतिनिधी |

कोरोना महासाथीची लाट ओसरल्यानंतर निवासी रिअल इस्टेट सेक्टरसाठी 2022 हे वर्ष चांगले ठरले. सरत्या वर्षात घरांची उच्चांकी विक्री झाली असल्याचे समोर आले आहे. वर्ष 2021 च्या तुलनेत सात शहरांमधील घरांच्या विक्रीत 54 टक्क्यांची तेजी दिसून आली आहे. सात शहरांमधील घरांच्या किंमतीतही 4 ते सात टक्क्यांची वाढ दिसून आली आहे.

एनारॉक या संस्थेने देशातील सात प्रमुख शहरातील 2022 मधील घर विक्रीची आकडेवारी जारी केली आहे. त्यानुसार, 2022 मध्ये सात शहरात एकूण 3 लाख 64 हजार 900 घरांची विक्री झाली आहे. ही विक्री 2021 च्या तुलनेत 54 टक्क्यांनी अधिक आहे. वर्ष 2021 मध्ये दोन लाख 36 हजार 500 घरांची विक्री करण्यात आली होती. त्याआधी वर्ष 2014 मध्ये 3 लाख 43 हजार घरांची विक्री झाली होती. आतापर्यंतचा हा सर्वाधिक घर विक्रीचा उच्चांक आहे. गृहकर्ज दरात वाढ, जागतिक पातळीवरील घडामोडी, या पार्श्‍वभूमीवर रिअल इस्टेट सेक्टरसाठी हे वर्ष चांगले लाभदायी ठरले असल्याचे एनारॉकचे अध्यक्ष अनुज पुरी यांनी सांगितले. या सात शहरांमध्ये एनसीआर, मुंबई महानगर, बेंगळुरू, पुणे, हैदराबाद, चेन्नई, कोलकाता या शहरांचा समावेश आहे.

मुंबईत सर्वाधिक प्रतिसाद
मुंबई महानगर क्षेत्रात सर्वाधिक घरांची विक्री झाल्याचे नोंदवण्यात आले आहे. मुंबई महानगर क्षेत्रात एकूण 1,09,700 घरांची विक्री झाली आहे, दिल्ली NCR मध्ये एकूण 63,700 घरांची विक्री झाल्याचे नोंदवण्यात आले. एनारॉकने दिलेल्या माहितीनुसार, 2022 मध्ये एकूण 3,57,600 निवासी घरे लाँच करण्यात आली आहे. वर्ष 2021 मधील 2,36,700 युनिट्सपेक्षा 51 टक्के अधिक आहे. तथापि, 2022 मध्ये नवीन घरांचे लाँचिंग 2014 च्या तुलनेत कमी आहे. मुंबई महानगर प्रदेश आणि हैदराबादमध्ये सर्वाधिक निवासी घरे उपलब्ध करून देण्यात आली होती.

45 टक्के घरांची किंमत 80 लाखांहून अधिक
आकडेवारीनुसार, नव्या निवासी घरांमध्ये 35 टक्के घरांच्या किंमती या 40 ते 80 लाखा दरम्यान आहेत. 28 टक्के घरांच्या किंमती 80 लाख ते 1.5 कोटींहून अधिक आहे. तर, 17 टक्के घरांची किंमती या 1.5 कोटींहून अधिक आहे. एनारॉकनुसार, एनसीआर क्षेत्रात मागणीच्या तुलनेत पुरवठा कमी आहे.