गोट फार्मच्या आड दहा लाखांची फसवणूक; तिघांवर गुन्हा

| पनवेल | प्रतिनिधी |

गोट फार्म बांधण्यासाठी आलेल्या खर्चाची खोटी बिले व कलेक्टर असल्याचे भासवून दहा लाखांची फसवणूक करण्यात आली. याप्रकरणी तिघांविरोधात खांदेश्‍वर पोलिसांनी गुन्हा दाखल केला. अभिषेक अशोक वाळंज, श्रीकांत अशोक वाळंज, चंद्रकांत केंडे अशी आरोपींची नावे आहेत.

संजना रसाळ या नवीन पनवेल येथे राहात असून, अभिषेक वाळंज व श्रीकांत चाळंज यांनी नागोठणे येथे गोट फार्म बकरी व्यवसाय चालू करण्याची कल्पना दिली. त्यासाठी त्यांना जागाही दाखवली. याशिवाय चंद्रकांत शेंडे हे रायगडचे कलेक्टर असल्याची ओळख करून दिली. कलेक्टर आल्याने गोट फार्म बनवण्यासाठी लागणारे साहित्य स्वस्त दरात मिळाल्याचे आणि ते व्यवसायात भागीदार असल्याचे सांगितले. त्यानुसार त्यांनी नऊ लाख रुपयांचा धनादेश व त्यांच्या पतीने दोन लाख रुपये त्यांच्या खात्यात जमा केले. परंतु, सहा महिने भागीदार म्हणून काम केल्यानंतर भागीदारीचा फायदा त्यांना दिला नाही. तसेच गोट फार्मसाठी केलेल्या खर्चाचा हिशोब मागितला असता एक लाख रुपये रसाळ यांच्या खात्यात जमा केले व हिशोबाच्या पावत्या दाखविल्या नाहीत. आपली फसवणूक झाल्याचे लक्षात येताच याबाबतची तक्रार त्यांनी खांदेश्‍वर पोलीस ठाण्यात दाखल केली.