धक्कादायक! आजाराला कंटाळलेल्या रोहनने संपवली जीवनयात्रा

। मुंबई । प्रतिनिधी ।
जळगावमधील एका तरुणाने राहत्या घरात गळफास घेऊन आत्महत्या केली. पोटाच्या विकाराला कंटाळून त्याने आत्महत्या केल्याचे सांगितले जात आहे. रोहन इंदरकुमार मेहता (२४) असे या मृत तरुणाचे नाव आहे. रविवारी सकाळी ८ वाजता सिंधी कॉलनीत ही घटना उघडकीस आली.

रोहनच्या कुटुंबीयांचे बळीरामपेठेत साडीचे दुकान आहे. याच दुकानावर रोहन व्यवसाय करीत होता. दरम्यान, गेल्या काही वर्षांपासून पोटाच्या विकारामुळे तो त्रस्त झाला होता. कुटुंबीयांनी अनेक रुग्णालयांमध्ये उपचार देखील केले होते. तरी देखील त्याचा त्रास कमी झालेला नव्हता. दरम्यान, नेहमीप्रमाणे रविवारी सकाळी ८ वाजता रोहन झोपेतून उठला. काही वेळ त्याने वृत्तपत्र वाचले. यावेळी कुटुंबीय कामानिमित्त घराबाहेर गेल्यानंतर रोहनने बेडरुमध्ये जाऊन गळफास घेत आत्महत्या केली. आई सुनिता ह्या घरात आल्यानंतर ही घटना उघडकीस आली. रोहनने गळफास घेतल्याचे पाहून त्यांना जबर धक्का बसला. रोहनच्या पश्चात वडील, आई, भाऊ असा परिवार आहे. या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे.