बिस्किटाच्या लालसेमुले चिमुकल्याचा मृत्यू

| ठाणे | वृत्तसंस्था |

अंबरनाथमध्ये घडलेल्या धक्कादायक घटनेनं संपूर्ण शहर हादरलं आहे. आईसोबत गेलेल्या 3 वर्षांच्या चिमुरड्याचा बिस्कीट कंपनीतील मशिनचा ब्लेट गळ्याला लागून मृत्यू आहे. धक्कादायक बाब म्हणजे, मशिनच्या ब्लेटवरून जाणारे  बिस्किट उचलण्यासाठी हा चिमुरडा गेला असताना ही दुर्दैवी घटना घडली आहे. ही घटना अंबरनाथमधील आनंद नगर भागात असलेल्या एमआयडीसीमधील एका बिस्कीट कंपीनीत घडली आहे. आयुष्य चौहान (3) असे मृत चिमुरड्याचे नाव आहे.

पोलिसांनी दिलेल्या माहितीनुसार, मृतक आयुष्य हा अंबरनाथ पूर्वेतील आनंद नगर एमआयडीसी नजीक असलेल्या ठाकूर पाडा भागातील एका चाळीत आईवडिलांसह राहत होता. तो मूळचा बिहार राज्यातील असून मृतकाची आई पूजा कुमारी नितेश चौहान (22) ही उपजीविकेसाठी बिस्कीट कंपनीतील 5 ते 6 कामगारांना जेवणाचे डब्बे पुरवते. नेहमीप्रमाणे 3 सप्टेंबर रोजी सकाळच्या सुमारास आनंद नगर एमआयडीसी भागातील चिखलोली  प्लॉट क्रमांक 40, 41 येथील बिस्किट बनवणाऱ्या राधे कृष्ण कंपनीत मृत मुलासोबत जेवणाचे डब्बे देण्यासाठी गेली होती. आयुषला मशिनच्या ब्लेटवरून बिस्किटे एका मागून एक जात असताना दिसले. त्यामधील एक बिस्किट उचलण्यासाठी तो वाकला. त्यानंतर त्याच्या गळ्याला बेल्ट लागून तो गंभीर जखमी झाला. दरम्यान, ही घटना पाहून कंपनीमधील कामगारांनी मशिन बंद करत चिमुरड्याला उल्हासनगर मधील मध्यवर्ती शासकीय रुग्णालयात दाखल केलं. मात्र, उपचारापूर्वीच त्याचा मृत्यू झाला.  याप्रकरणी अंबरनाथ पूर्वेतील शिवाजीनगर पोलीस ठाण्यात अकस्मात मृत्यूची नोंद करण्यात आली आहे. पोलिसांनी याप्रकरणी तपास सुरू केला आहे.