महामार्गावर ट्रेलरचा भीषण अपघात; चालक जागीच ठार

। सुकेळी । वार्ताहर ।

मुंबई-गोवा महामार्गावर दररोज कुठे ना कुठे तरी अपघातात घडत असतानाच महामार्गावर अपघातासाठी अत्यंत धोकादायक खिंड अशी ओळख असलेल्या सुकेळी खिंडीच्या उतारावरती खैरवाडी स्टाॅपच्या समोर ट्रेलर डिवाइडरला धडकून भीषण अपघात झाला. हा अपघात इतका भयंकर होता की या अपघातात ट्रेलरचालक जागीच ठार झाला. हा अपघात सोमवारी (दि.16) दुपारी 2 वाजण्याच्या सुमारास घडला.

मिळालेल्या माहितीनुसार, कोलाडकडून वाकणच्या दिशेने कंटेनर घेऊन जाणारा ट्रेलर सुकेळी खिंडीच्या उतारावरती आला असता ट्रेलरचालकाचे गाडीवरील नियंत्रण सुटल्यामुळे ट्रेलर सरळ जाऊन डिवाइडरला धडकला. त्यामुळे ट्रेलरवर असलेला कंटेनर 10 ते 15 फुट अंतरावर उलटा होऊन ट्रेलरदेखील पुर्णपणे पलटी झाला. यात ट्रेलरचालक पवन शिवाजी जाधव (33) हा केबिनमध्ये अडकून जागीच ठार झाला.

या अपघाताची माहिती मिळताच वाकण टॅबचे कर्मचारी तसेच ऐनघर ग्रामपंचायतीचे सदस्य मनोहरभाई सुटे, किशोर नावले यांनी घटनास्थळी तात्काळ धाव घेतली व हायड्राच्या सहाय्याने ट्रेलरचालकाला केबिनमधून बाहेर काढून त्याला नागोठणे सरकारी रुग्णालयात नेण्यात आले. या अपघाताचा पुढील तपास नागोठणे पोलीस स्टेशनचे पोलीस निरीक्षक सचिन कुलकर्णी करीत आहेत.