। मुंबई । प्रतिनिधी ।
मुंबईतील चेंबूर परिसरात एक भीषण घटना घडली आहे. 11 नंबर रोडवर आज एका भीषण अपघाताची घटना घडली आहे. दुपारी शाळा सुटल्यानंतर विद्यार्थ्यांना घेऊन जाणाऱ्या एका स्कूल बसवर अचानक एक अवाढव्य झाड कोसळले. या दुर्दैवी घटनेत बसमधील 10 शाळकरी मुले गंभीर जखमी झाली असून, अजूनही एक विद्यार्थी बसमध्ये अडकल्याची प्राथमिक माहिती समोर येत आहे. या घटनेमुळे संपूर्ण परिसरात प्रचंड खळबळ उडाली असून पालकांमध्ये भीतीचे वातावरण पसरले आहे.
मिळालेल्या प्राथमिक माहितीनुसार, चेंबूर येथील 11 नंबर रोडवरून संबंधित खाजगी स्कूल बस नेहमीप्रमाणे विद्यार्थ्यांना घेऊन जात होती. याच दरम्यान रस्त्याच्या कडेला असलेले एक जुने आणि मोठे झाड अचानक धावत्या बसवर उन्मळून पडले. झाडाच्या मोठमोठ्या फांद्या थेट बसच्या छतावर पडल्याने बसचा समोरील आणि मधला हिस्सा मोठ्या प्रमाणावर दाबला गेला. झाड कोसळताच बसमध्ये एकच आक्रोश आणि किंचाळ्या ऐकायला आल्या.
झाड कोसळल्याने बसमधील 10 विद्यार्थ्यांना गंभीर दुखापत झाली आहे. घटनेची माहिती मिळताच स्थानिक नागरिकांनी तातडीने धाव घेत बचावकार्य सुरू केले आणि जखमी मुलांना बसबाहेर काढले. जखमी झालेल्या सर्व विद्यार्थ्यांना तातडीने जवळच्या रुग्णालयात उपचारासाठी दाखल करण्यात आले आहे. सध्या त्यांच्यावर वैद्यकीय उपचार सुरू आहेत.
चेंबूरमध्ये स्कूल बसवर झाड कोसळले; दहा विद्यार्थी गंभीर जखमी
