भीषण अपघात! ट्रकने चिमुकलीला चिरडले

। ठाणे । प्रतिनिधी ।

भिवंडीच्या डॉ. एपीजे अब्दुल कलाम उड्डाणपुलावर एक भीषण अपघात घडला. शाळा सुटल्यानंतर आपल्या वडिलांसोबत दुचाकीवरून घरी जाणाऱ्या चिमुकलीला भरधाव ट्रकने चिरडले. खादीजा शेख (6) असे या मुलीचे नाव असून तिचे वडील डॉ. उमर शेख हे गंभीर जखमी झाले आहेत. सिराज कुरेशी असे ट्रकचालकाचे नाव असून पोलिसांनी त्याला अटक केली आहे.

नदी नाका परिसरातील फरिदाबाग येथे डॉ. उमर शेख हे राहतात. त्यांची मुलगी निजामपूर येथील माझरीन इंग्लिश स्कूलमध्ये शिकत होती. नेहमीप्रमाणे ते आपल्या मुलीला शाळेतून दुचाकीवरून घरी नेत होते. दरम्यान डॉ. एपीजे अब्दुल कलाम उड्डाणपुलावर येताच वेगात जाणाऱ्या ट्रकने त्यांना जोरदार धडक दिली. या धडकेत खादीजा ही खाली पडून ट्रकच्या चाकाखाली चिरडली गेली. तर उमर शेख हे विरुद्ध दिशेला कोसळले. ते गंभीर जखमी झाले असून त्यांना उपचारासाठी रुग्णालयात दाखल केले आहे. या घटनेने परिसरात हळहळ व्यक्त होत आहे.