जुहूच्या समुद्रात दोन अल्पवयीन मुलं बुडाली

एकाला वाचवण्यात यश; दुसऱ्याचा शोध सुरू

। मुंबई । प्रतिनिधी ।

जुहूमधील गोदरेज गेटजवळील सिल्व्हर बीचवर पोहण्यासाठी गेलेली दोन अल्पवयीन मुलं बुडाली. यातील एका मुलाला वाचविण्यास जीवरक्षकांना यश आले असून बेपत्ता मुलाचा शोध युद्धपातळीवर सुरू आहे. ही घटना शुक्रवारी (दि. 01) घडली.

घटनेतील दोन्ही मुलं जुहूमधील गोदरेज गेटजवळील सिल्व्हर बीचवर शुक्रवारी सकाळी भरतीच्या पाण्यात पोहण्यासाठी गेली होती. मात्र, पोहत असताना दोघे पाण्यात बुडू लागली. तेथे ड्युटीवर असणाऱ्या जीवरक्षकांनी तात्काळ धाव घेतली. बुडणाऱ्या दोघांपैकी एकाला वाचविण्यात जीवरक्षकांना यश आले. मात्र, दुसरा मुलगा लाटेबरोबर समुद्रात खेचला गेला. बेपत्ता मुलाची ओळख अद्याप पटलेली नाही.

या घटनेची माहिती मिळताच मुंबई अग्निशमन दल, स्थानिक पोलीस, बीएमसी के-वेस्ट वॉर्ड अधिकारी आणि 108 आपत्कालीन वैद्यकीय सेवा तात्काळ जुहू बीचवर दाखल असून मुलाचा शोध घेण्यासाठी युद्धपातळीवर शोधमोहिम सुरू आहे.