गॅस सिलेंडर स्फोटात दोन लहान मुलींचा मृत्यू

। सोलापूर । प्रतिनिधी ।

मंगळवेढा तालुक्यातील नंदेश्वर गावात एका छोट्या हॉटेलमध्ये घरगुती स्वयंपाक गॅसचा स्फोट झाला. दुर्घटनेत दोन लहान मुलींचा गंभीर भाजून मृत्यू झाला व त्यांच्या आई वडिलांसह चारजण भाजून जखमी झाले.श्रेया दादासाहेब गंगथडे (वय एक वर्ष) आणि स्वरा दादासाहेब गंगथडे (वय दोन वर्षे) अशी या दुर्घटनेतील दुर्देवी मृत मुलींची नावे आहेत. त्यांचे वडील दादासाहेब विष्णू गंगथरे आणि आई अनुजा यांच्यासह बहीण मोनाली तसेच सुनील राहुल गंगथडे हे भरून जखमी झाले आहेत. त्यांच्यावर सोलापूरच्या छत्रपती शिवाजी महाराज सर्वोपचार शासकीय रुग्णालयात उपचार सुरू आहेत.

मिळालेल्या माहितीनुसार गंगथडे कुटुंबीयाचा गावात छोटेखानी हॉटेल व्यवसाय आहे. तेथेच गंगथडे कुटुंबीय राहून स्वतः खाद्यपदार्थ, चहा तयार करून ग्राहकांना विकतात.दुपारी अडीचच्या सुमारास हॉटेलमध्ये घरगुती गॅसवर स्वयंपाक करत असताना गॅस सिलिंडरचा रेग्युलेटर काढताना आगीचा भडका उडाला. त्यातच गॅस पाईपला गळती झाली. त्यामुळे मोठा स्फोट झाला. यात गंगथडे कुटुंबातील दोन लहान मुलींचा आगीत होरपळून मृत्यू झाला. तर कुटुंबातील अन्य चौघे भाजून जखमी झाले.