भाविकांच्या कारचा अपघात; दोघांचा मृत्यू

। सोलापूर । प्रतिनिधी ।

सोलापूर-कोल्हापूर महामार्गावर कारचा भीषण अपघात झाला. या अपघातात तुळजापूरहून तुळजाभवानी मातेचे दर्शन घेऊन परतणाऱ्या दोन तरुण भाविकांच्या जागीच मृत्यू झाला. तर, तिघेजण जखमी झाले आहेत.

हा अपघात सांगोला तालुक्यातील चिंचोली बाह्यवळणावर पहाटेच्या सुमारास झाला. नवरात्रोत्सवाचे औचित्य साधून कोल्हापूरमधील काही तरुण मंडळी रविवारी रात्री कोल्हापूरहून तुळजापुरला तुळजाभवानी मातेच्या दर्शनासाठी गेले होते. सर्वजण दर्शन घेऊन कोल्हापूकडे परतत होते. त्याचवेळी चिंचोली बाह्यवळणावर त्याची गाडी 26 चाकी मालमोटारीवर जोरात धडकली. या अपघातात सुखदेव बामणे (40) आणि नैनेश कोरे (31) हे दोघे कारमधून बाहेर फेकले गेले आणि त्यांचा जागीच मृत्यू झाला. तर सुरज विभूते, सुधीर चौगुले, शिवानंद कोरे हे तिघे जण जखमी झाले. त्यांना वैद्यकीय उपचारासाठी सांगोला येथील खासगी रुग्णालयात दाखल करण्यात आले आहे.