अडगळीत पडलेले पुस्तक होणार वाचनीय
संकल्प फाऊंडेशनचा पुढाकार; वाचन संस्कृती जोपासण्यासाठी खास पुस्तकालय
| पनवेल | वार्ताहर |
वाचाल तर वाचाल अशा प्रकारचे एक घोषवाक्य आहे. आणि ते खरोखर वास्तववादी आहे. वाचनामुळे माणूस शहाणा आणि प्रगल्भ बनतो, त्याचबरोबर त्याला ज्ञानाचे दरवाजे खुले होतात. या पार्श्‍वभूमीवर संकल्प फाऊंडेशनच्या वतीने पुस्तकालय सुरू करण्यात येत आहे. यामध्ये अडगळीत पडलेले त्याचबरोबर आपल्याला नको असणारे पुस्तक जमा करता येऊ शकता. जेणेकरून ते इतरांना वाचनीय ठरतील, अशा प्रकारचे आवाहन संस्थेच्या संस्थापिका वैशाली जगदाळे यांनी केले आहे.
पुस्तक हे जरी जमिनीवर असले तरी त्याचे वाचन करून अभ्यास करणारा हा गगन भरारी घेतो. त्याच्या ज्ञानामध्ये कमालीची भर पडते. त्याचबरोबर बौद्धिक क्षमतासुद्धा यामुळे वाढते. वैचारिक पातळीत कमालीचा बदल होतो. पुस्तकासारखा दुसरा गुरु नसल्याचे विचारवंत सांगतात. अनेक पुस्तकांनी कित्येक जणांच्या जीवनामध्ये आमूलाग्र बदल घडवलेत. पुस्तकांमधील विचार आणि तत्त्वज्ञानाने अनेक विचारवंत आणि तत्त्वज्ञ घडवल्याचे उदाहरणे आहेत. या सर्व पार्श्‍वभूमीवर मुला-मुलींबरोबरच पालकसुद्धा वाचनाची आवड निर्माण व्हावी या अनुषंगाने काही सामाजिक संस्था काम करीत आहेत. त्यामध्ये पनवेल परिसरातील शालेय पाठ्यपुस्तकांची बुक बँक बनवणार्‍या संकल्प फाऊंडेशननेसुद्धा आग्रही भूमिका घेतल्याचे दिसून येत आहे.
फाऊंडेशनच्या संस्थापिका वैशाली जगदाळे यांनी संकल्प पुस्तकालय सुरू केले आहे. आपल्या घरामध्ये अडगळीत पडलेले त्याचबरोबर रद्दीत काढलेली पुस्तके या पुस्तकालयात जमा करण्याचे आवाहन त्यांनी केले आहे. जेणेकरून त्याचा वापर इतर वाचक करू शकतील, त्यातून त्यांना ज्ञान आणि उपयुक्त माहिती प्राप्त होऊ शकते, यामुळे आपण एक चांगला समाज घडवू शकू, अशा प्रकारचे मत संकल्प फाऊंडेशनच्या संस्थापिका वैशाली जगदाळे यांनी व्यक्त केले आहे.
वाचन संस्कृतीची वृद्धी होणार
संकल्प फाऊंडेशनच्या माध्यमातून सुरू करण्यात आलेल्या वाचनालयात जमा होणारी पुस्तके दहा दिवसांसाठी वाचकांना मोफत दिले जातील. त्यानंतर ते पुस्तक जमा करून दुसरे पुस्तक संबंधित वाचकाला उपलब्ध करून दिले जाईल. यामुळे वाचन संस्कृतीला एक प्रकारे प्रोत्साहन आणि प्रेरणा मिळेल. यातून संस्कारक्षम तसेच नैतिक मूल्यांची रुजवणूक करण्यास मदत होईल.
जर कोणाकडे थोर व्यक्तींचे चरित्र, गोष्टी, आत्मकथा, चारोळ्या आणि इतर प्रकारची पुस्तके असतील. आणि ते अडगळीत ठेवली असतील तर आपल्या संकल्प पुस्तकालय ती इतरांना वाचण्यास द्यावी. ही पुस्तके दहा दिवस वाचन करून परत पुस्तकालयात जमा करण्यात येतील. हे पुस्तकालय सर्वांसाठी खुले आणि मोफत राहील. पुस्तके जमा करण्यासाठी 8104738107 या क्रमांकावर संपर्क साधावा.
वैशाली जगदाळे
संस्थापिका संकल्प फाऊंडेशन, पनवेल
On 7th June 1937, Krushival was started as a weekly magazine and the masses got their platform. In the Raigad district, many new movements were launched to fight against injustice and exploitation upon the underprivileged and the hard-working common people.