दुहेरी मालमत्ताकरावर लवकरच निकाल

| पनवेल । वार्ताहर।

महापालिकेकडून आलेल्या दुहेरी मालमत्ताकराविरोधात खारघरमधील संविधानी लोक आंदोलनच्या वतीने दाखल करण्यात आलेल्या याचिकेवर दोन्ही बाजूने युक्तिवाद पूर्ण झाला आहे. या याचिकेवर 22 फेब्रुवारीला निकाल लागणार असल्यामुळे सिडको वसाहतीमधील मालमत्ताधारकांचे लक्ष आता निकालांकडे लागले आहे.

महापालिकेने 2016 पासून सिडको वसाहतीमधील मालमत्ताधारकांना लावलेल्या दुहेरी मालमत्ता कर व इतर समस्यांविरोधात खारघरमधील संविधानी लोक वतीने मुंबई उच्च न्यायालयात याचिका दाखल करण्यात आली होती. या याचिकेतील प्राथमिक मुद्द्यावरील सुनावणी झाली आहे. या वेळी न्यायालयाने दोन्ही बाजूंची मत ऐकून घेतली होती. या वेळी महापालिकेच्या वतीने बाजू मांडताना याचिकाकर्त्यांना कायद्यानुसार टॅक्स अपील दाखल करण्याचा अधिकार दिलेला असताना त्यांना उच्च न्यायालयात याचिका करता येत नाही. हे न्यायालयाच्या निदर्शनास आणून दिले. यावेळी न्यायालयाने 22 फेब्रुवारी रोजी निकाल जाहीर होईल, असे सांगितले. या वेळी संविधानी लोक आंदोलनाचे समन्वयक अ‍ॅड. जे. पी. खारगे, अ‍ॅड. विराज पाटील,अ‍ॅड. नम्रता तालाकोकुला काम पाहत होते.