गटारात अडकून महिला जखमी

| वसई | वृतसंस्था |

वसई विरारमध्ये विविध ठिकाणी अजूनही उघडी व तुटलेल्या अवस्थेत गटारांची झाकणे आहेत. याचा फटका नागरिकांना बसत आहे. नालासोपारा येथील रहेमत नगर येथे एका महिलेचा पाय अडकून जखमी झाली आहे. वसई विरार शहरात सांडपाणी निचरा होण्यासाठी विविध ठिकाणी गटार व्यवस्था करण्यात आली आहेत. त्यावर पालिकेने सुरुवातीला झाकणे बसविली होती. परंतु त्यांची देखभाल दुरुस्ती योग्यरित्या होत नसल्याने अजूनही अनेक ठिकाणी गटारांची झाकणे उघडी व तुटलेल्या अवस्थेत आहे. या ठिकाणाहून ये-जा करणाऱ्या नागरिकांच्या जीवाला धोका कायम आहे. या उघड्या गटारांच्या दुरुस्तीकडे पालिकेने दुर्लक्ष केले असल्याने अपघाताच्या घटनाही समोर येऊ लागल्या आहेत.

नालासोपारा प्रभाग समिती ब मधील रेहमत नगर येथे गटाराचे झाकणे उघडे असल्याने नुकताच फुटपाथवरून चालत जाताना महिला गटारात अडकून जखमी झाली आहे. उघड्या गटारामुळे शहरात अनेक अपघात घडले आहेत. अशी स्थिती असतानाही पालिकेने विविध प्रभागातील गटाराच्या झाकणांच्या दुरुस्तीकडे पालिकेने लक्ष दिलेले नाही. पालिकेने शहरातील गटार व्यवस्थेचे सर्वेक्षण करून दुरुस्ती करण्याची मागणी नागरिकांनी केली आहे.

दुरुस्तीही निकृष्ट दर्जाची?

पालिकेकडून तुटलेल्या गटारांची दुरुस्ती केली जाते परंतु करण्यात येत असलेली दुरुस्ती सुद्धा काही ठिकाणी निकृष्ट पद्धतीने केली. जात असल्याने अनेक झाकणे ही तात्काळ तुटून जात  आहेत. त्यामुळे गटारांचे झाकणे बसविताना ती सुस्थितीत आहेत किंवा नाही याची खात्री करावी असे नागरिकांनी सांगितले आहे.