धावत्या रिक्षात तरुणीचा विनयभंग

| मुंबई | प्रतिनिधी |

एका अनोळखी इसमाने रिक्षात शिरून 16 वर्षीय महाविद्यालयीन तरुणीचा विनयभंग केल्याची घटना वांद्रे येथे घडली. चालकाला शस्त्राचा धाक दाखवून त्याने धावत्या रिक्षात मागील आसनावर बसलेल्या महाविद्यालयीन तरूणीचा विनयभंग केला.

मिळालेल्या माहितीनुसार, मुंबईतील वांद्रे पश्चिम येथे महाविद्यालयीन विद्यार्थिनीचा धावत्या रिक्षात विनयभंग करण्यात आला. सोमवारी (दि.21) दुपारी बारा वाजण्याच्या सुमारास 16 वर्षीय विद्यार्थिनी महाविद्यालयात जाण्यासाठी निघाली होती. एसव्ही रोडवरील बोस्टन हॉटेलजवळ अफाक खान याने जबरदस्तीने रिक्षा थांबवली आणि रिक्षा चालक नाही म्हणत असतानाही तो त्या रिक्षामध्ये बसला. रिक्षा मध्ये बसताच अफाकने थोडं पुढे उतरायचं असल्याचं खोटं कारण सांगून रिक्षाचालकाला रिक्षा सिग्नलच्या पुढे घेऊन जाण्यास भाग पाडले. रिक्षा सिग्नलच्या पुढे जाताच आरोपीने विद्यार्थिनीला आणि रिक्षाचालकाला धारदार शस्त्राचा धाक दाखवत विद्यार्थिनीवर विनयभंग केला. पुढच्या सिग्नलवर रिक्षा थांबताच आरोपीने रिक्षातून पळ काढला. घाबरलेल्या पीडितेने मात्र कॉलेजला जाण्याऐवजी घरचा रस्ता गाठला. पीडितेने घडलेली घटना कुटुंबाला सांगितली असून, कुटुंबीयांनी आरोपी विरोधात गुन्हा दाखल केला आहे. पीडितेने पोलिसांना दिलेल्या जवाबानुसार, आरोपी तिच्या ओळखीचा नसून तो जबरदस्ती रिक्षामध्ये घुसला. रिक्षाचालकाने आणि तरुणीने नकार देऊनही संबंधित आरोपी रिक्षामध्ये बसला. आरोपीने धारदार शस्त्राचा धाक दाखवत पीडितेला धमकावलं आणि तिच्यावर विनयभंग केला. याप्रकरणी पोलिसांनी आरोपीला ताब्यात घेतले असून, त्याच्यावर गुन्हा दाखल करण्यात आला आहे.