भयानक! पूर्ववैमनस्यातून सशस्त्र हल्ला; तरुणाचा मृत्यू

महिलेसह सहा जखमी

। सांगली । प्रतिनिधी ।

पूर्ववैमनस्यातून सहा जणांवर धारदार शस्त्राने हल्ला केल्याची धक्कादायक घटना तासगाव तालुक्यात घडली आहे. या जीवघेण्या हल्लयात एका तरुणाचा मृत्यू झाला तर महिलेसह पाच जण जखमी झाले आहेत. जखमींवर भिवघाट येथील खाजगी रुग्णालयात उपचार सुरू आहेत.

तासगाव तालुक्यातील वायफळे येथे पूर्ववैमनस्यातून सहा जणांवर धारदार शस्त्राने खुनी हल्ला करण्यात आला. वायफळे येथील फाळके कुटुंबीयांमध्ये गेल्या अनेक वर्षांपासून किरकोळ कारणांवरून वाद सुरू आहेत. याच वादातून या कुटुंबांमध्ये अनेकदा भांडणे झाली असून शस्त्राने हल्लेसुद्धा झाले आहेत. गुरुवारी सायंकाळी सहा वाजण्याच्या दरम्यान दहा ते बारा जणांचे टोळके दुचाकीवरून वायफळे येथील बसस्थानक चौकात आले. तेथे उभ्या असणाऱ्या ओंकार उर्फ रोहित संजय फाळके याच्यावर व त्याच्यासोबत असणाऱ्या इतर दोघांवरही या टोळक्याने हल्ला चढवला. त्यानंतर रोहित हा आपल्या घराकडे पळून गेला. दरम्यान, बस स्थानक चौकात बसलेल्या सिकंदर शिकलगार (रा. वायफळे) यांच्यावरही या टोळक्याने विनाकारण हल्ला केला. यात तो जखमी झाला.

त्यानंतर हे टोळके भर चौकातून नंग्या तलवारी नाचवत रोहित फाळके यांच्या घराकडे गेले. यावेळी घरासमोर रोहित याच्यावर हल्ला चढवला. याचवेळी रोहितचे वडील संजय, आई जयश्री या मध्ये आल्या असता त्यांनाही या टोळक्याने धारदार शस्त्राने मारहाण केली आणि टोळक्याने तेथून पलायन केले. हल्ल्यातील सर्व जखमींना भिवघाट येथील सिद्धिविनायक हॉस्पिटलमध्ये उपचारासाठी दाखल करण्यात आले. उपचारादरम्यान ओंकार उर्फ रोहित संजय फाळके (24) याचा मृत्यू झाला. तर अन्य जखमींवर उपचार सुरू आहेत.

या घटनेची माहिती मिळताच तासगाव पोलिसांनी वायफळे येथे धाव घेतली. हा हल्ला वायफळे बसस्थानक चौकातील सीसीटीव्हीमध्ये कैद झाला असून सीसीटीव्हीमधील फुटेजवरून हल्लेखोरांचा शोध सुरू आहे.