अध्यक्षांचा स्वीय सचिव लाचखोर

महिला शिक्षिकेच्या बदलीसाठी मागितली दीड लाखाची लाच

| रायगड | जिल्हा प्रतिनिधी |

रायगड जिल्हा परिषदेच्या महिला शिक्षिकेच्या बदलीसाठी दीड लाख रुपयांची लाच घेणे, जिल्हा परिषद अध्यक्षांच्या स्वीय सचिवाला महागात पडले. रायगडच्या लाचलुचपत प्रतिबंधक विभागाने बुधवारी (दि.23) सायंकाळी एका खासगी हॉटेलमध्ये लाच घेताना त्याला रंगेहाथ पकडले. या कारवाईने जिल्हा परिषदेच्या पारदर्शक कामाबाबत प्रश्न उपस्थित केला जात असून, या घटनेनंतर रायगड जिल्हा परिषदेत खळबळ उडाली आहे. या कारवाईने लाचखोरांना दणका मिळाला आहे.

मिळालेल्या माहितीनुसार, योगेश प्रकाश भस्मे (46) असे या लाचखोर अधिकाऱ्याचे नाव आहे. रायगड जिल्ह्यातील उरण येथील तो रहिवासी आहे. गेल्या अनेक वर्षापासून जिल्हा परिषदेच्या अर्थ विभागात सहाय्यक लेखाधिकारी या पदावर कार्यरत आहे. गेल्या काही महिन्यांपासून तो जिल्हा परिषदेचे अध्यक्ष मंगेश वाकडीकर यांच्याकडे स्वीय सचिव म्हणून काम करीत आहे. तक्रारदार यांची पत्नी जिल्हा परिषदेच्या शाळेमध्ये शिक्षिका आहेत. त्यांच्या बदलीसाठी अर्ज करण्यात आला होता. तक्रारदार यांच्या पत्नीची बदली करून देण्यासाठी योगेश भस्मे यांनी दीड लाख रुपयांची लाच मागितली होती. अखेर तक्रारदाराने रायगडच्या लाचलुचपत प्रतिबंधक विभागाकडे याप्रकरणी तक्रार दाखल केली. तक्रारीचे गांभीर्य ओळखून लाचलुचपत प्रतिबंधक रायगडच्या उप अधीक्षक सरिता भोसले यांनी कारवाई सुरु केली. लाच मागितल्याची पडताळणी केल्यावर पथक तयार करण्यात आले. उप अधीक्षक सरिता भोसले, पोलीस निरीक्षक निशांत धनावडे, पोलीस उपनिरीक्षक अरुण करकरे, पोलीस हवालकार परम ठाकूर, नवदीप नांदगांवकर आदी पथकाने बुधवारी (दि.23)सायंकाळी सापळा रचला. अलिबागमधील एका हॉटेलमध्ये दीड लाख रुपयांची लाच घेताना योगेश भस्मे याला रंगेहाथ पकडण्यात आले. रायगडच्या लाचलुचपत प्रतिबंधक विभागाने मोठी कारवाई केल्याने जिल्हा परिषदेमध्ये खळबळ उडाली आहे. याच प्रकरणात लाच स्वीकारताना एसीबीने त्याला ताब्यात घेतले. या कारवाईनंतर जिल्हा परिषदेच्या प्रशासकीय कामकाजातील पारदर्शकतेबाबतही प्रश्न उपस्थित झाले आहेत. या प्रकरणाचा पुढील तपास लाचलुचपत प्रतिबंधक विभागाकडून सुरू आहे.

लाच नेमकी कोणासाठी ?
रायगड जिल्हा परिषदेचे अध्यक्ष मंगेश वाकडीकर यांचे स्वीय सचिव योगेश भस्मे यांना दीड लाख रुपयांची लाच घेताना रंगेहाथ पकडण्यात आले. एका महिला शिक्षिकेच्या बदलीसाठी ही लाच मागितली होती. परंतु, ही लाच नक्की कोणासाठी मागितली असा प्रश्न जनतेकडून उपस्थित केला जात आहे. या मागील खरा सूत्रधार कोण असा सवाल चर्चेतून निर्माण झाला आहे.

उपअधीक्षकांकडून आवाहन
शासकीय कार्यालयातील अधिकारी, कर्मचारी तसेच अन्य एजंटद्वारे लाचेची मागणी करणाऱ्यांविरोधात रायगडच्या लाचलुचपत प्रतिबंधक विभागाकडे तक्रार करण्यात यावी. कोणी आढळून आल्यास कार्यालयाशी संपर्क साधावा असे आवाहन लाचलुचपत प्रतिबंधक विभागाचे उपअधीक्षक सरिता भोसले यांनी केले.