तीन वर्षांच्या अबोलीची ‌‘शिवगर्जना’

| चौल | प्रतिनिधी |

अवघ्या तीन वर्षांची चिमुरडी अबोली किशोर कडव हिने गुरुवारी साजऱ्या होणाऱ्या शिवजयंतीच्या पार्र्श्वभूमीवर सादर केलेली महाराजांची शिवगर्जना ऐकून उपस्थित सर्वजण अक्षरशः भारावून गेले. नावात ‘अबोली’ असली तरी तिच्या बोलण्यात मात्र कमालीचा आत्मविश्वास आणि धाडस दिसून येते. विशेष म्हणजे छत्रपती शिवाजी महाराज यांच्याविषयी ती इतक्या ओघवत्या शब्दांत आणि भरभरून बोलते की ऐकणाऱ्यांच्या अंगावर शहारे येतात.

तीन वर्षांच्या या गोजिऱ्या मुलीचे बोबडे बोल आणि त्यातील जोश सर्वांना चकित करून गेले. इतक्या लहान वयात इतिहासाची जाण, शब्दांची स्पष्टता आणि भावपूर्ण सादरीकरण यामुळे अबोलीने सर्वांची मने जिंकली. बाळाचे पाय पाळण्यात दिसतात ही म्हण तिच्या बाबतीत अगदी खरी ठरते. तिच्या सादरीकरणातून तिच्या उज्ज्वल भवितव्याची झलक स्पष्टपणे दिसून येते.

अबोलीची आई पनवेल येथील नामांकित शाळेत शिक्षिका असून, वडील एका कंपनीत नोकरीला आहेत. घरातून मिळालेल्या संस्कारांची आणि सातत्याने मिळालेल्या प्रोत्साहनाची हीच फलश्रुती तिच्या सादरीकरणातून जाणवते. लहान वयातच संस्कृती, इतिहास आणि शौर्यपरंपरेची ओळख करून देण्याचे कार्य तिच्या कुटुंबीयांनी प्रेमाने केले आहे. शिवाजी महाराजांच्या जयंतीनिमित्त अबोलीने व्यक्त केलेले हे प्रेम आणि अभिवादन सर्वांसाठी प्रेरणादायी ठरले आहे. आधुनिक युगातही आपल्या परंपरेचा अभिमान बाळगणारी आणि ती ठामपणे व्यक्त करणारी नवी पिढी घडत असल्याचे हे सुंदर उदाहरण आहे. अबोलीच्या कंठातून दुमदुमलेली महाराजांची शिवगर्जना ही केवळ सादरीकरण नव्हे, तर तिच्या हृदयातील शिवप्रेमाची साक्ष आहे.

मला शिवाजी महाराज आवडतात
मला शिवाजी महाराज खूप आवडतात मी मोठी होऊन त्यांच्यासारखी धाडसी होणार! असे अबोली आनंदाने सांगते. छत्रपती शिवाजी महाराज यांच्याबद्दल बोलताना तिच्या चेहऱ्यावरचा उत्साह आणि चमक सर्वांचे मन जिंकून घेते.

इतक्या लहान वयात तिला छत्रपती शिवाजी महाराज यांच्याबद्दल एवढे प्रेम आणि आकर्षण आहे, याचा आम्हाला मनापासून अभिमान आहे. आम्ही फक्त तिला योग्य संस्कार देण्याचा प्रयत्न करतोय; तिची ही जिद्द आणि आत्मविश्वास पाहून आनंद होतो.

– किशोर कडव,
अबोलीचे वडील

अबोलीला लहानपणापासूनच छत्रपती शिवाजी महाराज यांच्या गोष्टी ऐकायला खूप आवडतात. ती स्वतःहून शिवगर्जना म्हणते, हे पाहून खूप आनंद होतो. तिच्या बोबड्या बोलांतून व्यक्त होणारे हे शिवप्रेम आमच्यासाठी अभिमानाचा क्षण आहे.

-स्नेहल कडव,
अबोलीची आई