उमेदवारी अर्ज दाखल करण्यासाठी 20 तासांचा अवधी

आजपासून होणार सुरुवात, 7 मे रोजी मतदान प्रक्रिया

| रायगड | खास प्रतिनिधी |

(दि.12) ते (दि.19) एप्रिल या कालावधीत लोकसभा निवडणुकीसाठी उमेदवारी अर्ज स्वीकारले जाणार आहेत. आठ दिवसांच्या कालावधीत तीन सरकारी सुट्ट्या आहेत. त्यामुळे उमेदवारांकडे अर्ज दाखल करण्यासाठी पाचच दिवस आहेत. 11 ते 3 या वेळेत फक्त 20 तासांचा अवधी उमेदवारांना मिळणार आहे. येत्या (दि.7) मे रोजी मतदान होत असून, संपूर्ण जिल्ह्यातील 23 लाख 16 हजार 515 मतदारांची यादी (दि.23) जानेवारी रोजी प्रसिद्ध करण्यात आली आहे, असे जिल्हाधिकारी तथा जिल्हा निवडणूक निर्णय अधिकारी किशन जावळे यांनी सांगितले.

जिल्हाधिकारी कार्यालयात गुरुवारी आयोजित करण्यात आलेल्या पत्रकार परिषदेत ते बोलत होते. भारत निवडणूक आयोगाकडून सार्वत्रिक लोकसभा निवडणूक 2024 च्या निवडणुकीचा कार्यक्रम सुरू झाला असून, नामनिर्देशनपत्र भरणेसाठी सर्वसाधारण सूचना करण्यासाठी दिनांक, वेळ, ठिकाण आणि इतर आवश्यक बाबीची माहिती राजकीय पक्षांची बैठक घेऊन देण्यात आली आहे. सार्वजनिक सुट्टीच्या दिवशी नामनिर्देशनपत्र स्वीकारले जाणार नाहीत, असे त्यांनी स्पष्ट केले.

जिल्ह्यात आदर्श आचार संहिता लागू झालेली आहे. रत्नागिरी जिल्ह्यामधील दापोली व गुहागर विधानसभा क्षेत्राचा रायगड मतदारसंघात समावेश होतो. त्यातील मतदारांसह मतदारसंघामध्ये एकूण 16 लाख 53 हजार 935 मतदार आहेत. मतदान दिवशी मतदान प्रक्रियेचे लाईव्ह वेबकास्टिंग केले जाणार आहे. निवडणुकीबाबतची नियम 3 मधील नमुन्याची निवडणुकीची सूचना (दि.12) एप्रिल रोजी वर्तमान पत्रातून प्रसिध्द करण्यात येणार आहे. याची प्रसिध्दी निवडणूक निर्णय अधिकारी यांच्यासह सहाय्यक निवडणूक निर्णय अधिकारी. तहसील कार्यालये, रायगड, रत्नागिरी जिल्ह्यातील पंचायत समिती कार्यालय, नगरपालिका व नगर पंचायत कार्यालय, सर्व ग्रामपंचायती ठिकाणी लावण्यात येणार आहे.

निवडणूक पारदर्शक पद्धतीने होण्यासाठी सक्षम अ‍ॅप, आपले उमेदवार ओळखा (क्नो युवर कँडडेट अ‍ॅप), सी-विजिलअ‍ॅप, बोगस व्होटर अ‍ॅप यासह तंत्रज्ञानाचा वापर करून प्रणाली कार्यरत आहेत. पोस्टल मतदारांसाठी (इटीपिबियस) प्रणाली वापरताना प्रशासनाकडून यंत्रणा कार्यान्वित करण्यात येत आहेत. या अनुषंगाने कारवाई करताना जिल्ह्यात 1691 पैकी 1409 शस्त्रे जमा झाली असून, राज्यात रायगड जिल्हा पाचव्या क्रमांकावर आहे. तसेच राज्य उत्पादन शुल्क विभागाने 216 गुन्हे दाखल केले आहेत. भरारी पथके (फ्लाईंग स्काड) कार्यरत झाले आहेत. व्हिडिओ निरीक्षण पथक (व्हिडिओ सर्विलंस टीम-व्हीएसटी), खर्च निरीक्षण पथक (स्टाटिक सर्विलंस टीम-एसएसटी) अशी विविध पथकं स्थापन करण्यात आली आहेत. तसेच मतदान बुथ, वोटर हेल्पलाईन विविध अ‍ॅपची माहिती दिली. मतदान प्रक्रियेबाबत माहिती व दिव्यांग मतदारांना मतदानासाठी असलेल्या सेवासुविधांची माहिती यावेळी जिल्हाधिकारी जावळे यांनी दिली.

याप्रसंगी पोलीस अधीक्षक सोमनाथ घार्गे, अपर जिल्हाधिकारी सुनील थोरवे, उपजिल्हा निवडणूक अधिकारी स्नेहा उबाळे, खर्च पथक प्रमुख राहुल कदम, सहायक निवडणूक निर्णय अधिकारी मुकेश चव्हाण, जिल्हा माहिती अधिकारी मनीषा पिंगळे आदी उपस्थित होते.