37 कोरोनामुक्त, अलिबागसह 10 तालुक्यात नवीन रुग्ण नाही
। अलिबाग । विशेष प्रतिनिधी ।
रायगड जिल्ह्यात बुधवार दि. 17 नोव्हेंबर रोजी कोरोनाच्या 29 नव्या रुग्णांची नोंद झाली आहे. दिलासादायक म्हणजे उपचारादरम्यान आज सलग दुसर्या दिवशी एकाही रुग्णाचा मृत्यू झाला नाही. तर दिवसभरात तब्बल 37 रुग्ण कोरोनामुक्त झाले. तसेच अलिबाग तालुक्यासह 10 तालुक्यांमध्ये एकही रुग्ण नोंद झालेली नसल्याची माहिती जिल्हा प्रशासनाने दिली.
बुधवारी पनवेल महापालिका हद्दीत 16, पनवेल ग्रामीण 5, उरण 2, कर्जत 1, पेण 2, रोहा 2 असे एकूण 29 रुग्ण आढळले. तसेच खालापूर, अलिबाग, मुरुड, माणगाव, तळा, सुधागड, श्रीवर्धन, म्हसळा, महाड आणि पोलादपूर या 10 तालुक्यांमध्ये आज एकही नवा रुग्ण आढळून आलेला नाही.
आतापर्यंत रायगड जिल्ह्यातील एकूण कोरोना बाधित रुग्णांची संख्या 1 लाख 71 हजार 714 झाली आहे. यापैकी 1 लाख 66 हजार 926 रुग्ण कोरोनातून बरे झाले आहेत. तर मृतांचा आकडा 4 हजार 563 वर गेला आहे. सद्यस्थितीत 225 सक्रीय रुग्ण कोरोनावर उपचार घेत आहेत.