नवघर शाखेतील प्रकार, गुन्हा दाखल
| उरण | वार्ताहर |
तालुक्यातील भेंडखळ गावची प्रज्वला लक्ष्मण ठाकूर यांचे बँक ऑफ महाराष्ट्र नवघर शाखेत खाते होते. त्यांच्या खात्यावरील 31 लाखांची रक्कम परस्पर काढून त्यांची फसवणूक केल्याची घटना उघडकीस आली आहे. या संदर्भात उरण पोलीस ठाण्यात बँक कर्मचारी मकरंद भोईर व चेतन इंटरप्रायझेस यांच्या विरोधात गुन्हा दाखल करण्यात आला आहे.
प्रज्वला ठाकूर यांनी मुलीच्या नावे 20 लाख रुपयांची एफडी करावयाची असल्याचे सांगितले. एफडी करण्यासाठी बँक कर्मचारी मकरंद भोईर याच्यावर विश्‍वास ठेवून चेकबुक व पासबुक त्याच्याकडे दिले. त्यानंतर अनेक दिवस उलटूनही फिर्यादीला एफडी प्रमाणपत्र न मिळाल्याने त्यांनी बँकेत जाऊन विचारणा केली असता त्यांच्या खात्यावर अवघी 24 हजार सातशे अठ्ठेचाळीस इतकी रक्कम असल्याचे निदर्शनास आले.
बँक मॅनेजर यांनी फिर्यादीला बचत खात्याचा तपशील समजवून सांगितला असता त्यांच्या खात्यावरील 20 लाख 27/6/2022 रोजी व रुपये 10 लाख दि. 21/10/2022 रोजी आरोपी नंबर 2 चेतन इंटरप्रायझेस या खात्यावर जमा झाल्याचे दिसते. तर रुपये 1 लाख 6/10/2022 रोजी आरोपी नंबर 1 मकरंद भोईर याने काढून घेतल्याचे उघड झाले आहे. यावरून बँक कर्मचारी मकरंद भोईर व चेतन इंटरप्रायझेसचा खातेदार यांनी संगनमताने फिर्यादीची एकूण 31 लाखांची फसवणूक केल्याचा गुन्हा उरण पोलीस ठाण्यात दाखल झाला आहे. या प्रकरणी आरोपी विरोधात भादवी कलम 420 व 34 प्रमाणे गुन्हा दाखल करण्यात आला आहे. याप्रकरणी वरिष्ठ पोलीस निरीक्षक शिंदे यांच्या मार्गदर्शनाखाली पोलीस उपनिरीक्षक शिवराज सोनवणे हे अधिक तपास करीत आहेत.