हृदयद्रावक! मोटारसायकल अपघातात 5 वर्षीय चिमुकल्याचा मृत्यू;वडिलांवर गुन्हा दाखल

। नवीन पनवेल । प्रतिनिधी ।
पनवेल तालुक्यातील कर्नाळा खिंडीत भरधाव मोटारसायकलवरील नियंत्रण सुटल्याने झालेल्या अपघातात मोटारसायकलवरील 5 वर्षीय मुलाचा मृत्यू तर त्याचे आई वडील व भाऊ गंभीर जखमी झाल्याची घटना शनिवारी घडली. या घटनेत मोटारसायकल चालक असलेल्या मृत मुलाच्या वडीलांनी भरधाव वेगात, निष्काळजीपणे मोटारसायकल चालविल्याने हा अपघात झाल्याचे आढळून आले. त्यामुळे पनवेल तालुका पोलिसांनी मृत मुलाच्या वडीलांविरोधात गुन्हा दाखल केला आहे.

या अपघातात मृत झालेल्या मुलाचे वडील तेजस पाटील (36), मृत मुलाचे नाव विहान पाटील (5) सोनल पाटील (32) आणि भाऊ जय (7) असे चौघेजण मोटारसायलवरुन प्रवास करीत होते. हे कुटुंब नेरुळ सेक्टर-10 मध्ये राहण्यास असून त्यांचे मुळगाव हे अलिबाग येथील पोयनाड आहे. 30 एप्रिल रोजी सायंकाळी तेजस हा पत्नी व दोन मुलांसह आपल्या मुळ गावी जात होता. पॅशन मोटारसायकलवर पाठीमागे पत्नी सोनल बसली तर दोघांमध्ये 7 वर्षीय मुलगा जय व विहान बसला.

रात्री पावणे आठ वाजण्याच्या सुमारास त्यांची मोटारसायकल कर्नाळा खिंडीतील नागमोडी रस्त्याच्या वळणावरुन जात असताना, तेजसचे भरधाव वेगात असलेल्या मोटारसायकलवरून नियंत्रण सुटले. त्यामुळे त्याची मोटारसायकल तेथील भिंतीला धडकुन चौघेजण खाली पडून गंभीर जखमी झाले. त्यामुळे त्या सर्वांना एमजीएम हॉस्पीटलमध्ये दाखल करण्यात आले. यात गंभीर जखमी असलेला विहान याचा उपचारादरम्यान मृत्यू झाला. या अपघातात तेजस पाटील याने भरधाव वेगात निष्काळजीपणे मोटारसायकल चालवुन नेल्यामुळे अपघात झाल्याचे आढळुन आल्याने पनवेल तालुका पोलिसांनी तेजस पाटील विरोधात गुन्हा दाखल केला आहे.