उमेदवाराकडे केवळ 500 रुपयांची मालमत्ता

देशातील दुसरा सर्वात गरीब

| नागपूर | प्रतिनिधी |

देशात लोकसभा निवडणूकीचे वारे वाहत असताना कुठल्या मतदारसंघात किती कोट्यावधीश उमेदवार आहे, कोणत्या उमेदवाराकडे किती कोटी रुपये आहेत ही चर्चा रंगली आहे. मात्र, दुसरीकडे या निवडणूक काही उमेदवार अत्यंत गरीब आहेत.

निवडणूक भरलेल्या नामांकनपत्राच्या आधारावरील लोकसभा निवडणूकीतील पहिल्या फेरीतील टॉप-10 गरीब उमेदवारांची यादी जाहीर करण्यात आली आहे. या यादीमध्ये महाराष्ट्रातील रामटेक लोकसभा मतदारसंघातील उमेदवाराचाही समावेश आहे. रामटेक मतदारसंघातून उभे असलेले उमेदवार कार्तिक गेंदलाल डोके यांनी स्वत:कडे केवळ 500 रुपयांची मालमत्ता असल्याचा दावा नामांकनपत्रात केला आहे. टॉप-10 गरीब उमेदवारांच्या यादीत कार्तिक डोके दुसर्‍या क्रमांकावर आहेत. 44 वर्षीय डोके हे विश्‍व हिंदू जनसत्ता पक्षाचे आंतरराष्ट्रीय अध्यक्ष असून अपक्ष म्हणून निवडणूकीच्या रिंगणात उभे आहेत. देशात पहिल्या फेरीत त्यांच्यापेक्षा गरीब उमेदवार तमिळनाडूतील थूत्तुकुडी मतदारसंघातील आहे. पोनराज के. नावाच्या या उमेदवाराकडे केवळ 320 रुपयांची मालमत्ता आहे. रामटेक लोकसभा मतदारसंघातील कार्तिक डोके हे नागपूरच्या इतवारीमध्ये राहतात. स्वत:ला सामाजिक कार्यकर्ते असल्याचा दावा ते करतात.

स्टेट बँक ऑफ इंडियामध्ये त्यांचे खाते असल्याची माहिती त्यांनी शपथपत्रात दिली, मात्र त्यात पैसे नसल्याचे त्यांनी सांगितले. त्यांच्या नावावर एक मारुती अल्टो-800 गाडी देखील आहे. मात्र रोख रक्कम केवळ 500 रुपये आहे, असे डोके शपथपत्रात म्हणाले. त्यांच्या नावावर एकही गुन्हा दाखल नसल्याचा तसेच एकही न्यायालयीन प्रकरण नसल्याचा दावा त्यांनी केला आहे.