आशियाई क्रीडा स्पर्धेमध्ये भारतीय खेळाडूंची प्रतिष्ठा पणाला!

शरथ, रोहन, बजरंग, श्रीजेशची पदकांसाठी झुंज

| नवी दिल्ली | वृत्तसंस्था |

चीनमध्ये 23 सप्टेंबरपासून सुरू होणाऱ्या आशियाई क्रीडा स्पर्धेमध्ये भारतीय खेळाडूंचा कस लागणार आहे. टेनिसपटू रोहन बोपण्णा, हॉकीपटू पी. आर. श्रीजेश, टेबल टेनिसपटू शरथ कमल, कुस्तीपटू बजरंग पुनिया, स्क्वॅशपटू दीपिका पल्लीकल, टेनिसपटू अंकिता रैना, थाळीफेकपटू सीमा पुनिया या खेळाडूंची ही अखेरची आशियाई स्पर्धा असण्याची दाट शक्यता आहे. त्यामुळे पदकावर मोहोर उमटवण्यासाठी या सर्व खेळाडूंना प्रयत्नांची शिकस्त करावी लागणार आहे.

रोहन बोपण्णाने या वर्षी विंबल्डनच्या उपांत्य फेरीत आणि अमेरिकन ओपनच्या अंतिम फेरीपर्यंत मजल मारली. 43 वर्षीय रोहनने रविवारी डेव्हिस करंडकातील अखेरचा सामना खेळला. भारताच्या विजयात त्याने मोलाची भूमिका बजावली. आशियाई स्पर्धेतील पुरुषांच्या दुहेरीत तो युकी भांब्रीच्या साथीने सहभागी होईल. 2018 मधील आशियाई स्पर्धेमध्ये त्याने दिवीज शरणच्या साथीने सुवर्णपदक पटकावले होते. आता यंदा सुवर्णपदक राखण्यासाठी त्याला जिवाचे रान करावे लागणार आहे.

41 वर्षीय टेबल टेनिसपटू शरथ कमल याने जकार्ता येथे झालेल्या आशियाई स्पर्धेमध्ये दोन ब्राँझपदकाची कमाई केली होती. एवढेच नव्हे तर राष्ट्रकुल क्रीडा स्पर्धेमध्ये तीन सुवर्णपदके जिंकण्यातही त्याने यश मिळवले होते. राष्ट्रकुल व आशियाई या दोन्ही क्रीडा स्पर्धांमध्ये जमीन-अस्मानचा फरक आहे. शरथसह जी. साथियन व हरमीत देसाई या भारतीयांचा पदक जिंकण्यापर्यंतचा प्रवास सोपा नसणार आहे. गोलरक्षक पी. आर. श्रीजेश याने भारतीय पुरुष हॉकी संघासाठी 301 लढती खेळल्या आहेत. मागील आशियाई स्पर्धेमध्ये भारताला ब्राँझपदकावर समाधान मानावे लागले होते. यंदा पदकाचा रंग बदलण्यासाठी भारतीय हॉकी संघाला प्रयत्न करावे लागणार आहेत.त्यासाठी श्रीजेशचा अनुभव मदतीला येऊ शकतो. भारतीय हॉकी संघाने तब्बल चार दशकानंतर ऑलिंपिकमध्ये पदक जिंकण्याची किमया करून दाखवली होती. आता आशियाई स्पर्धेमध्येही सुवर्णपदक जिंकण्याची आशा बाळगता येणार आहे.

29 वर्षीय कुस्तीपटू बजरंग पुनिया याचीही आशियाई स्पर्धा ही अखेरची असणार आहे. 2014 मधील आशियाई स्पर्धेमध्ये 61 किलो वजनी गटात रौप्यपदक जिंकल्यानंतर 2018 मधील आशियाई स्पर्धेमध्ये सुवर्णपदक पटकावण्याची देदीप्यमान कामगिरी बजरंग पुनियाकडून करण्यात आली. आता आशियाई स्पर्धेमध्ये पदकाची हॅट्ट्रिक साधण्यासाठी तो मॅटवर उतरेल यात शंका नाही.

महिलांची शिकस्त
भारताच्या काही महिला खेळाडूंसाठी आगामी आशियाई स्पर्धा अखेरची असणार आहे. यामध्ये दीपिका पल्लीकल, सीमा पुनिया व अंकिता रैना या खेळाडूंचा समावेश आहे. टेनिस खेळाडू अंकिता रैना हिने 2018 च्या आशियाई स्पर्धेमधील महिला एकेरीत ब्राँझपदक पटकावले. या प्रतिष्ठेच्या क्रीडा महोत्सवातील टेनिस या खेळातील एकेरी विभागात पदक जिंकणारी ती भारताची सानिया मिर्झानंतरची दुसरी खेळाडू ठरली होती. यंदा अंकिता महिला दुहेरीत व मिश्र दुहेरीत सहभागी होणार आहे. स्क्वॅशपटू दीपिका पल्लीकल हिने आंतरराष्ट्रीय स्तरावर पदकांची लयलूट केली आहे. यंदा ती मिश्र दुहेरीत सहभागी होणार आहे. जुळ्या मुलांची आई झालेल्या दीपिकाची ही अखेरची स्पर्धा असेल यात शंका नाही. त्यामुळे पदकासाठी ती सर्वस्व पणाला लावेल. थाळीफेकपटू सीमा पुनिया हिने मागील दोन्ही स्पर्धांमध्ये पदकावर हक्क सांगितला आहे. यंदा पदकाची हॅट्ट्रिक साजरी करण्यासाठी ती सज्ज झाली असेल.