शिवाजी पार्कसाठीचा ठाकरेंचा मार्ग मोकळा; शिंदे गटाचं एक पाऊल मागे

। मुंबई । वृत्तसंस्था ।

शिवाजी पार्कमध्ये दसरा मेळावा कोणाचा? यावरुन शिंदे गट आणि ठाकरे गट आक्रमक झाले होते. आता मात्र शिंदे गटानं एक पाऊल मागे घेत, दसरा मेळाव्याचा शिवाजी पार्क मैदानावरचा आपला दावा सोडला आहे. मुंबई महापालिकेकडे शिंदे गटानं शिवाजी पार्कसाठी केलेला अर्ज शिंदे गट मागे घेणार आहे. मुख्यमंत्री एकनाथ शिंदे यांच्या सूचनेनंतर सदा सरवणकर स्वतः मुंबई महापालिकेच्या कार्यालयात जाऊन अर्ज मागे घेणार असल्याची माहिती मिळत आहे.

शिवसेनेचा दसरा मेळावा प्रत्येक शिवसैनिकासाठी अत्यंत महत्त्वाचा आणि नवचैतन्य जागवणारा असतो. पण शिवसेनेतील अंतर्गत बंडाळीनंतर इतर अनेक मुद्द्यांप्रमाणेच दसरा मेळाव्यावरुनही वादावादी झाली. गेल्या वर्षी दसरा मेळाव्याचा वाद हायकोर्टापर्यंत गेला होता. यंदाही दोन्ही गटांनी शिवाजी पार्कसाठी अर्ज करत दावा केला होता. पण, आता शिंदे गटानं याबाबत एक पाऊल मागे येत, शिवाजी पार्कऐवजी इतर मैदानांच्या पर्यायाचा विचार करण्याचा निर्णय घेतला आहे. शिंदे गटाचा यंदाचा मेळावा दक्षिण मुंबईतील क्रॉस मैदान किंवा ओव्हल ग्राउंडवर घेण्यात येणार असल्याची माहिती शिंदे गटाचे नेते आणि मंत्री दीपक केसरकर यांनी दिली. तसेच, आपण इतर मैदानांची चाचपणी करतोय, त्यामुळे शिवाजी पार्कसाठीचा अर्ज मागे घेण्याच्या सूचना स्वतः मुख्यमंत्री एकनाथ शिंदे यांनी दिल्या आहेत. शिवाजी पार्कवर दसरा मेळाव्यासाठी सदा सरवणकरांनी महापालिकेकडे अर्ज केला होता. आता स्वतः सदा सरवणकच हा अर्ज मागे घेणार असल्याची माहिती मिळत आहे.

अशातच आता ठाकरेंना दसरा मेळाव्यासाठी शिवाजी पार्क मैदान मिळाल्याचा मार्ग मोकळा झाला असल्याचं बोललं जात आहे. मात्र अद्याप मुंबई महानगरपालिकेकडून शिवाजी पार्क मैदानाबाबत कोणताही निर्णय घेण्यात आलेला नाही. त्यामुळे शिंदे गटानं एक पाऊल मागे घेत जरी दसरा मेळाव्याचं ठिकाण बदललं असलं तरी, ठाकरेंचा दसरा मेळावा शिवाजी पार्कवर होणार का? हा प्रश्न कायम आहेच. सध्या मात्र शिवसेनेच्या शिंदे गटानं घेतलेल्या भूमिकेमुळे दसरा मेळाव्यासाठी शिवाजी पार्क नेमकं कोणाला मिळणार? हा वाद संपुष्टात आला आहे.