सेहवागच्या मुलाची बॅट तळपली

आर्यवीरनेही केली चौकाराने सुरुवात

| नवी दिल्ली | वृत्तसंस्था |

वीरेंद्र सेहवागने आपल्या धडाकेबाज फलंदाजीच्या जोरावर मैदानं गाजवली आणि आपली एक खास ओळख निर्माण केली. त्याच्या पावलावर पाऊल ठेवत त्याचा मुलगा आर्यवीरही आता समोर आले आहे. सेहवागसारखीच धमाकेदार फटकेबाजी त्याच्याकडून पाहायला मिळाली आहे. राहुल द्रविडच्या मुलाच्या फलंदाजीची काही दिवसांपूर्वी चांगलीच चर्चा होता. आपल्या मुलाची फलंदाजी पाहण्यासाठी खास द्रविड मैदानात उपस्थित होता. त्यानंतर आता सेहवागच्या मुलाची जोरदार चर्चा क्रिकेट वर्तुळात सुरु झाली आहे. कारण सेहवागच्या मुलानेही आपल्या वडिलांसारखीच आक्रमक सुरुवात केल्याचे आता समोर आले आहे. सेहवागचा मुलगा आर्यवीर हा दिल्लीच्या संघाकडून खेळतो. पण त्याची शैली ही सेहवागसारखीच असल्याचे चाहते सांगत आहेत.

आर्यवीर बीसीसीआयच्या 16 वर्षांखालील विजय मर्चंट ट्रॉफीमध्ये दिल्लीच्या संघाकडून खेळत होता. यावेळी दिल्लीचा सामना महाराष्ट्राच्या संघाशी होता. आर्यवीरने या सामन्यात दिल्लीच्या संघाला दमदार सुरुवात करून दिली. त्याने पहिल्याच चेंडूवर चौकार वसूल केला आणि सर्वांनाच यावेळी वीरेंद्र सेहवागची आठवण आल्यावाचून राहिली नाही. कारण, वीरू हा नेहमीच डावाी सुरुवात आक्रमक करायचा. बऱ्याचदा सेहवागने चौकारासह भारताच्या डावाची सुरुवातही केली आहे. त्यामुळे जेव्हा आर्यवीरने चौकारासह आपल्या आपल्या खेळीची सुरुवात केली त्यावेळी सर्वांनाच वीरूची आठवण आली आणि आर्यवीरही त्याचासारखाच फलंदाज होईल, अशी भाकीतंही वर्तवली गेली. आर्यवीर हा सध्याच्या घडीला 16 वर्षांखालील क्रिकेट खेळत आहे. त्यामुळे त्याच्यापुढे अजून बराच कालावधी आपल्याला सिद्ध करण्यासाठी आहे. त्यामुळे यापुढे आर्यवीर कशी कामगिरी करतो, याकडे सर्वांचे लक्ष लागलेले राहील.