विद्यार्थ्यांनी यशस्वी होण्यासाठी जिद्द ठेवावी: नयन कर्णिक

| मुरुड-जंजिरा | वार्ताहर |

स्पर्धात्मक युगात नवनवीन आव्हानांना सामोरे जावे लागते. विद्यार्थीवर्गाने यशस्वी होण्यासाठी जिद्द व चिकाटी कायम ठेवावी, असे प्रतिपादन माजी तहसिलदार नयन कर्णिक यांनी केले.

मुरुड जंजिरा हिंदू एज्युकेशन सोसायटी संचलित ओंकार बालवाडी व ओंकार विद्या मंदिर यांच्यातर्फे आयोजित वार्षिक बक्षीस वितरण समारंभात अध्यक्षपदावरून कर्णिक बोलत होते. यावेळी व्यासपीठावर हिंदू एज्यु सोसायटीचे चेअरमन दिलीप जोशी, ओंकार विद्या मंदिर संस्थेच्या अध्यक्षा दीपाली जोशी, सचिव सुनील विरकुड, विश्‍वस्त मृदुला आबदेव, दिलीप दांडेकर, मनोहर गुरव, अशोक दिवेकर, नयन कर्णिक, मनाली सतवीडकर, दत्तोपंत गायकवाड, मुख्याध्यापिका प्रविता गार्डी, ज्योती मसाल, रुपेश टक्के, स्वाती पाटील, मनिषा करडे आदी मान्यवर उपस्थित होते.

यावेळी प्रमुख अतिथी अ‍ॅड. मनाली सतवीडकर यांनी मनोगतात मी या शाळेची विद्यार्थिनी असून मला संस्काराची शिदोरी देणार्‍या सर्वच शिक्षकवृंदांविषयी कृतज्ञता बाळगते. या ओंकार बालवाडीतील अनेक विद्यार्थी उच्च पदस्थ असल्याचे अभिमानपूर्वक सांगितले. मराठी माध्यमातून शिक्षण घेतल्याने विद्यार्थ्याचा सर्वांगिण विकास होत असल्याचा निर्वाळा देत मराठीचे महत्त्व अधोरेखित केले. प्रास्ताविक करताना संस्थेचे अध्यक्ष दिलीप जोशी यांनी अतिवृष्टीमुळे तसेच शासकीय सुट्टीचा कालावधी वाढल्याने वार्षिक स्नेहसंमेलन घेता आले नसल्याची खंत व्यक्त केली. 2014 पासून सुरु झालेल्या ओंकार विद्या मंदिराची यंदा 10 वीची पहिली बॅच बाहेर पडणार असून, प्रशिक्षित शिक्षक वर्ग संस्थेने नियुक्त केला आहे. संस्थेला आर्थिक सहकार्य करण्याचे नागरिकांसह पालकांना आवाहन केले.

या कार्यक्रमात कला, क्रीडा व विज्ञान आदी विषयांत बक्षिसे प्राप्त करणार्‍या विद्यार्थ्यांना मान्यवरांच्या हस्ते प्रशस्तीपत्रे देण्यात आली. कार्यक्रमाचे सूत्रसंचालन सुनील विरकुड यांनी तर आभार प्रदर्शन प्रविता गार्डी यांनी केले.