हिरवळ महाविद्यालयात महिला उद्योजक मार्गदर्शन शिबीर !

| माणगाव | प्रतिनिधि |

हिरवळ एज्युकेशन ट्रस्ट कॉलेज ऑफ सायन्स महाड मधील महिला विकास कक्ष व करियर कट्टा विभागांमार्फत महिला उद्योजकांना प्रोत्साहन देण्यासाठी विशेषत: महिलांसाठी डिझाइन केलेल्या बँकिंग योजनांवर 10 फेब्रुवारी 2024 रोजी मार्गदर्शन आयोजित करण्यात आले होते. या शिबिराचे प्रमुख पाहुणे म्हणून दि अण्णासाहेब सावंत सहकारी बँक, महाडचे सहाय्यक व्यवस्थापक तेजस वनारसे उपस्थित होते.

महाविद्यालयाचे प्राचार्य सुदेश कदम यांनी त्यांच्या प्रास्ताविकात महिला उद्योजकांना त्यांच्या व्यावसायिक प्रयत्नांमध्ये मदत करण्यासाठी उपलब्ध असलेल्या अनेक बँकिंग कार्यक्रमांची माहिती दिली. तेजस वनारसे यांनी महिलांना व्यावसायिक जगतामध्ये सक्षम बनविण्याच्या उद्देशाने बँकेच्या महिलांसाठी असणाऱ्या विविध योजनांविषयी सखोल माहिती दिली. त्याच्या मार्गदर्शनाने आणि अनुभवाने विद्यार्थ्यांच्या ज्ञानात मोलाची भर पडली. विद्यार्थ्यांना त्यांच्या व्यावसायिक उद्दिष्टांना सहाय्य करण्यासाठी उपलब्ध आर्थिक साधने आणि संसाधनांची विस्तृत माहिती समजावून सांगितली. त्यांच्या मार्गदर्शनात महिला उद्योजक म्हणजे काय, महिलांसाठी बँकेच्या विविध योजना, कर्जासाठी सरकारने आणलेल्या विविध योजना, महिलांसाठी असणारे कर्जाचे विविध प्रकार हे विविध यशस्वी महिला उद्योजकांची उदाहरणे देऊन माहिती सांगितली.

हिरवळ एज्युकेशन ट्रस्टचे आदरणीय अध्यक्ष किशोर धारिया यांनी महिलांच्या आर्थिक स्वातंत्र्याच्या प्रगतीसाठी मार्गदर्शन शिबीराच्या उपयुक्ततेवर अभ्यासपूर्ण विचार मांडले. महिलांनी देशाच्या आर्थिक प्रगतीत हातभार लावून विकसित भारत या सरकारच्या संकल्पनेला मूर्त स्वरूप प्राप्त करून देण्याचे आवाहन केले. उद्योजकतेच्या क्षेत्रात महिला सक्षम करण्याच्या महाविद्यालयाच्या या उपक्रमाबद्दल आभार व्यक्त केले.

हिरवळ एज्युकेशन ट्रस्टच्या संचालिका सोनाली धारिया यांनी माहिती तंत्रज्ञान, कॉम्प्युटर सायन्स आणि सायन्स क्षेत्रात काम करणाऱ्या महिलांसाठी स्वागतार्ह वातावरण निर्माण करण्यासाठी या सेमिनारचे महत्व यावर मत मांडले. महिलांना त्यांच्या निवडलेल्या व्यवसायात सक्षम आणि समर्थन देणाऱ्या शैक्षणिक संधी उपलब्ध करून देण्यासाठी अश्या उपक्रमांची गरज त्यांनी अधोरेखित केली. हिरवळ एज्युकेशन ट्रस्टच्या मुख्य सल्लागार डॉ. संध्या कुलकर्णी यांनी व्यवसाय आणि तंत्रज्ञान क्षेत्रातील लैंगिक तफावत कमी करण्यासाठी या कार्यक्रमाचे महत्त्व यावर आपले विचार मांडले. त्यांनी अधिक वैविध्यपूर्ण आणि सर्वसमावेशक कामाच्या ठिकाणी शिक्षणाच्या गरजेवर भर दिला. हिरवळ एज्युकेशन ट्रस्ट कॉलेजने महिलांना शैक्षणिक आणि व्यावसायिक उद्दिष्टे साध्य करण्यासाठी प्रोत्साहन आणि सक्षम बनवण्याच्या उद्देशाने संभाषण आणि कल्पनांच्या देवाण- घेवाणीसाठी एक मंच उपलब्ध करून दिला.