| पनवेल | वार्ताहर |
नवी मुंबई पोलीस आयुक्तालयाच्या हद्दीतील रस्त्यालगत जलवाहिन्या व इतर कामासाठी टाकलेले सरकारी लोखंडी पाईप चोरणारा सराईत गुन्हेगार नवी मुंबई पोलीस गुन्हे शाखा युनिट तीनने शिताफीने पकडला असून, त्याची रवानगी तळोजा कारागृहात करण्यात आली आहे.
नवी मुंबई पोलीस आयुक्तालयाच्या हद्दीतील वाशी, उरण, खारघर, उल्हासनगर व मुंबई येथील रस्त्यालगत जलवाहिन्या व इतर कामासाठी ठेवलेले पाईप व केबल चोरीच्या घटना गेल्या अनेक वर्षांपासून मोठ्या प्रमाणात होत होत्या; परंतु या चोर्या करणारा सराईत गुन्हेगार पोलिसांच्या हातावर तुरी देत होता. चोरी करण्याची ठिकाणे बदलून हा सराईत गुन्हेगार चोरी करत असे. एहसनुल्लाह मोहम्मद नाईम शेख ऊर्फ सानू, रा. साकीनाका व त्याचा साथीदार राजपथ रमामिलान गौड यास अटक केलेल्या चोराचे नाव असून, याला युनिट तीनच्या पथकाने गुप्त बातमीदारामार्फत माहिती घेऊन अटक केली आहे.
सदर सराईत हा महामार्ग व नवीन विकसित होत असलेली ठिकाणे हेरून त्या रस्त्यालगत असलेल्या जलवाहिनीसाठी व इतर कामासाठी टाकलेले पाईप सदर ठिकाणची रेकी करून सुट्टीच्या दिवशी चोरी करत असे. या कामासाठी तो नवी मुंबईमधील रस्त्याने जात असलेले हायड्राक्रेन व ट्रेलरचा उपयोग करत असे. सदर चोर हा मोबाईलवरून हायड्राक्रेन व वाहनतळावरील ट्रेलरवरून ट्रेलर मालकाचा नंबर मिळवून त्यांना फोन करून ट्रेलर व हायड्राक्रेनचा समन्वय घडवून शिताफीने पाईप गाडीवर लोड करून भंगारवाल्यांना हे पाईप विकत असे. हायड्राक्रेन व वाहतूकदारांना नियमित भाड्यापेक्षा थोडे जास्त व रोख स्वरूपात भाडे देत असल्याने व सुट्टीच्या दिवशी व्यवसाय मिळत असल्याने सदर व्यावसायिक हे कुठलीही शहनिशा न करता सदर सराईताला आपली वाहने देत असत. त्यामुळे चोरी करणे सोपे जात असे.
सदर गुन्हेगार हा एका कामाच्या वेळी एकच फोन व एकच सीमकार्ड वापरत असल्याने गेल्या कित्येक वर्षांपासून तो पोलिसांना गुंगारा देत होता. परंतु, नवी मुंबई पोलीस गुन्हे शाखेच्या युनिट तीनचे वरिष्ठ पोलीस निरीक्षक हनिफ मुलानी, एपीआय संतोष चव्हाण, लिंगराज देवकाते, चेतन जेजूरकर, दिनेश जोशी, सुधीर पाटील यांच्या पथकाने पकडून त्याची रवानगी तळोजा कारागृहात करण्यात आली आहे.