वृद्धांसाठी आनंदाची बातमी! ‘या’ योजनेंतर्गत होणार मोफत उपचार

| नवी दिल्ली | वृत्तसंस्था |

18 व्या लोकसभेला संबोधित करताना राष्ट्रपती द्रौपदी मुर्मू यांनी वयस्कर लोकांसाठी एक खुशखबर दिली आहे. 70 वर्षांपुढील सर्व व्यक्तींचा आयुष्यमान योजने अंतर्गत मोफत उपचार होणार आहेत. विशेष म्हणजे भारतीय जनता पक्षाने लोकसभा निवडणुकीआधी घोषणापत्रामध्ये याचा उल्लेख केला आहे. द्रौपदी मुर्मू यांनी सांगितले की, नव्या सरकारमध्ये 70 वर्षांच्या पुढील सर्व व्यक्तींना आयुष्यमान भारत योजनेचा फायदा घेता येणार आहे. शेतकऱ्यांसाठी सरकार चांगले काम करत आहे. शेतकऱ्यांना २० हजार कोटी रुपये ट्रान्सफर करण्यात आले आहेत. या माध्यमातून आपण शेतकऱ्यांना जास्त आत्मनिर्भर केले आहे.

प्रत्येक 70 वर्षांपुढील व्यक्तीला आयुष्यमान भारत योजनेंतर्गत आणले जाईल आणि त्यांच्यावर मोफत उपचार केले जातील. आयुष्यमान भारत योजनेचा विस्तार करण्यात येईल आणि त्यात वृद्ध व्यक्तींना आणण्यात येईल. त्यांना मोफत आणि चांगली आरोग्य सुविधा पुरवली जाईल, या योजनेची सुरुवात अरुण जेटली यांनी 2019 मध्ये केली होती. याला प्रधानमंत्री जन आरोग्य योजना असे देखील म्हटले जाते. या योजनेअंतर्गत 5 लाख रुपयांपर्यंत उपचार मोफत केले जातात. दरम्यान, 24 जून रोजी 18 व्या लोकसभेचे पहिले अधिवेशन सुरु झाले आहे. आज राष्ट्रपती द्रौपती मुर्मू यांचे अभिभाषण झाले. यावेळी त्यांनी सरकारने केलेल्या कामाचा उल्लेख केला.