क्रीडा लवादाने एका ओळीतच विनेश फोगाटचा विषय संपवला

| नवी दिल्ली | वृत्तसंस्था |

कुस्तीपटू विनेश फोगाट हीच्या पदकाच्या आशा संपुष्टात आल्या आहेत. गेल्या सात दिवसांपासून विनेशला रौप्य पदक मिळावे यासाठी खटाटोप सुरु होता. यासाठी क्रीडा लवादाकडे दाद मागण्यात आली होती. पण अपील फेटाळून लावल्याने आता आशा संपुष्टात आल्या आहेत.

भारतीय ऑलिम्पिक संघाने हा निकाल जाहीर केला आहे. त्यामुळे भारताची पॅरिस ऑलिम्पिक स्पर्धेतील पदक संख्या ही सहाच राहणार आहे. दुसरीकडे, भारतीय ऑलिम्पिक असोसिएशनची अध्यक्षा पीटी उषा यांनी या निर्णयानंतर आश्‍चर्य व्यक्त केले आहे. तसेच विनेश फोगाटसोबत उभं असल्याचे सांगितले आहे. पॅरीस ऑलिम्पिक स्पर्धेत विनेश फोगाटने 50 किलो वजनी गटात भाग घेतला होता. वर्ल्ड चॅम्पियन युई सुसाकी आणि त्यानंतर आणखी दोन कुस्तीपटूंना धूळ चारत विनेश अंतिम फेरीत पोहोचली होती. पण 100 ग्रॅम वजन अधिक निघाले आणि अपात्र ठरली.

विनेशने यापूर्वी सुवर्ण पदकाच्या लढाईसाठी अपील केली होती. सीएएसने तेव्हाच तिची अपील फेटाळून लावली होती. त्यानंतर उपांत्य फेरीत पराभूत झालेली स्पर्धक अंतिम फेरी खेळली. त्यानंतर विनेशने संयुक्तरित्या रौप्य पदक मिळावे यासाठी अपील केली. पण ही याचिका देखील फेटाळून लावण्यात आली आहे. त्यामुळे विनेशचे पदक स्वप्न भंगले आहे. दरम्यान सीएएसने एका ओळीतच निकाल दिला आहे. ‘7 ऑगस्टला विनेश फोगाटकडून दाखल करण्यात आलेला अर्ज रद्द करण्यात आला आहे.’, इतकंच सीएएसने निकालात लिहिले आहे. 13 ऑगस्टला निकाल येणार होता. पण हा निकाल पुढे ढकलण्यात आला होता.
महिला कुस्तीपटू विनेश फोगाट हीला आता रौप्य पदकही मिळणार नाही. क्रीडा लवादाने ( कोर्ट ऑफ आर्बिट्रेशन फॉर स्पोर्ट) विनेश फोगाट हीची याचिका फेटाळली आहे. विनेशने वाढीव वजनानंतर अपात्रत ठरवल्यानंतर सीएएसमध्ये धाव घेतली होती. आपल्याला किमान संयुक्तरित्या रौप्य पदक देण्यात यावं, अशा मागणीची याचिका विनेशने केली होती. मात्र सीएएसने ही याचिका फेटाळून लावली आहे. त्यामुळे भारताला रौप्य पदक मिळणार नसल्याचं आता स्पष्ट झाले आहे.