पॅरालिम्पिकमध्ये पदकांचा चौकार

। पॅरिस । वृत्तसंस्था ।

पॅरिस पॅरालिम्पिक स्पर्धेत भारतासाठी शुक्रवारचा दिवस खास ठरला आहे. कारण या दिवशी भारताच्या खात्यात चार पदकांची भर पडली असून नेमबाजांनी हा दिवस गाजवला आहे. यात नेमबाज अवनी लेखराने ऐतिहासिक सुवर्णपदक जिंकले आहे. तिचे हे पॅरालिम्पिकमधील दुसरे सुवर्णपदक ठरले आहे. याशिवाय तिच्याच क्रीडा प्रकारात मोना अगरवाल हिनेही कांस्य पदकाला गवसणी घातली आहे. तसेच, पुरुषांच्या 10 मीटर एअर पिस्तुल 1 प्रकारात मनीष नरवालने रौप्य पदक पटकावले. यामुळे एकाच दिवसात भारताला नेमबाजीतून तीन पदके मिळाली आहेत. इतकंच नाही तर महिलांच्या 35 100 मीटर प्रकारात प्रीती पालने देखील कांस्य पदक जिंकले आहे. ती ऍथलेटिक्सच्या ट्रॅक प्रकारात पदक जिंकणारी भारताची पहिलीच खेळाडू ठरली आहे. दरम्यान, या चारही खेळाडूंचा इथपर्यंतचा प्रवास सोपा नव्हता. त्यांनी अत्यंत जिद्दीने खेळ करत अडथळे पार करत हा टप्पा गाठला आहे.

अवनी लेखराचा सुवर्ण वेध
पॅरिस पॅरालिम्पिकमध्ये शुक्रवारी (दि.30) भारताच्या खात्यात पहिले पदक आले. भारताच्या अवनी लेखरा हिने महिलांच्या 10 मीटर एअर रायफल स्टॅन्डिंग 1 प्रकारात सुवर्ण पदकाला गवसणी घातली आहे. याच प्रकारात भारताच्या मोना अगरवालने कांस्य पदक जिंकले आहे. अवनीचे हे दुसरे सुवर्णपदक असून तिने टोकियोमध्ये झालेल्या पॅरालिम्पिकमध्येही सुवर्णपदक जिंकले होते. त्यामुळे ती पॅरालिम्पिकमध्ये दोन सुवर्णपदक जिंकणारी पहिलीच भारतीय महिला खेळाडू ठरली आहे. तिने टोकियो ऑलिम्पिकमध्ये 50 मीटर रायफल 3 पोझिशनमध्ये देखील कांस्य पदक जिंकले होते. तिने आशियाई क्रीडा स्पर्धेतही सुवर्ण पदक जिंकले होते. अवनीने अंतिम फेरीत सुरुवातीपासूनच चांगली वय पकडली होती. तिने 249.7 गुण मिळवत सुवर्ण पदक जिंकले. तसेच, रौप्य पदक जिंकलेल्या कोरियाच्या युन्री ली हिने 246.8 गुण मिळवले आहेत. तसेच, मोनाने 228.7 गुण मिळवले आहेत.

मोनाची कांस्यपदकावर मोहोर
मोना अगरवाल हिने अवनी लेखरा खेळत असलेल्या महिलांच्या 10 मीटर एअर रायफल स्टॅन्डिंग 1 या प्रकारात कांस्यपदक पटकावले आहे. जयपूरची मोना अगरवाल 9 महिन्यांची असतानाच तिला पोलिओ झाला होता. आणि त्यामुळे तिला दिव्यांगत्व आले आहे. पुढे तिचं लग्न भारताचा माजी व्हिलचेअर बास्केटबॉल खेळाडू रविंद्र चौधरीबरोबर झाले. तिला तिच्या आजीनेही मोठा पाठिंबा दिला. मोना हिला लग्नानंतर अविक आणि आरवी हे मुलंही आहे. पण तिने 2021 मध्ये नेमबाजीत करियर करायचं ठरवलं आणि तिने पॅरालिम्पिकपर्यंत धडही मारली.

मनिषचा ‘रौप्य’ निशाणा
पॅरिस पॅरालिम्पिक स्पर्धेत भारताचा नेमबाज मनीष नरवाल याने रौप्यपदक जिंकले आहे. हे भारताचे पॅरिस पॅरालिम्पिकमधील चौथे पदक ठरले आहे. मनीष नरवालने पुरुषांच्या 10 मीटर एअर पिस्तुल 1 प्रकारात हे पदक जिंकले आहे. नेमबाजीतील भारताचे हे आत्तापर्यंतचे यंदाच्या पॅरालिम्पिकमधील तिसरे पदक आहे. मनीषने अंतिम फेरीत 234.9 गुण मिळवत रौप्य पदकावर हक्क सांगितला. त्याला कोरियाच्या जोंगडू जो याने मागे टाकत सुवर्ण पदक जिंकले. हरियाणातील मनिष नरवाल याला जन्मत: दिव्यांगत्व आले होते. त्याच्या उजव्या हाताला अपंगत्व आहे. त्याला फुटबॉलमध्येही खूप रस होता. तो स्थानिक क्लबसाठीही खेळायचा, पण त्याच्या दिव्यांगत्वामुळे त्याला पुढे फार काही करता आले नाही. त्याच्या वडिलांनी त्याला राकेश ठाकुर यांच्या शूटिंग ऍकेडमीत दाखल केले. त्यांनी त्याला नेमबाजीचे धडे दिले. मनिषची भाऊ शिवा आणि बहीण शिखा हे देखील भारतासाठी नेमबाजी करतात. शिवाने आशियाई क्रीडा स्पर्धेत सुवर्णपदकही मिळवले होते, तर जागतिक कनिष्ठ अजिंक्यपद 2021 या स्पर्धेत शिखाने सुवर्ण पदक जिंकले होते. तसेच, मनिषने आत्तापर्यंत केलेल्या कामगिरीमुळे त्याला खेलरत्न आणि अर्जुन पुरस्कारानेही सन्मानित करण्यात आले.

प्रीती पालची कांस्य झेप
भारतासाठी प्रीती पाल हिने पॅरिस पॅरालिंपिकमध्ये अ‍ॅथलेटिक्समधील पदकाचे खाते उघडले आहे. तिने महिलांची 100 मीटर शर्यत (टी) 14.21 सेकंद अशा वेळेत पूर्ण करीत कांस्यपदकाला गवसणी घातली आहे. तिने वैयक्तिक सर्वोत्तम वेळेसह हे पदक पटकावले आहे.
मुझफ्फरनगरमधील प्रीती पाल ही एका शेतकरी कुटुंबातील आहे. जन्माच्या 6 दिवसातच तिच्या शरिराचा खालचा भाग कमकुवत असल्याचे समोर आले होते. तिच्या पायात ताकद यावी यासाठी अनेक प्रयत्न करण्यात आले होते. परंतु, त्याचा फारसा फायदा झाला नाही. तिनेही परिस्थितीपुढे हार न मानता वयाच्या 17 व्या वर्षी पॅरालिम्पिक पाहत असताना तिला प्रेरणा मिळाली. तिला पॅरालिम्पिक खेळाडू फातिमा खातून यांना भेटण्याची संधी मिळाली. तिने त्यांच्या मदतीने राज्य पॅरा ऍथलेटिक्स चॅम्पियनशीप 2018 स्पर्धा खेळली. ती आशियाई क्रीडा स्पर्धेत 100 आणि 200 मीटरमध्ये चौथ्या क्रमांकावर राहिली. पण तिने आणखी प्रयत्न केले. ती प्रशिक्षक गजेंद्र सिंग यांच्याकडून मार्गदर्शन घेण्यासाठी दिल्लीला आली. तिने नंतर वर्ल्ड पॅरा ऍथलेटिक्स चॅम्पियनशीपमध्ये 100 आणि 200 मीटर प्रकारांमध्ये कांस्य पदक जिंकत पॅरिस पॅरालिम्पिकसाठीही दावेदारी ठोकली होती.