संशोधन केंद्राची स्वच्छता मोहीम

। कर्जत । प्रतिनिधी ।

प्रादेशिक कृषी संशोधन केंद्रातर्फे राष्ट्रपिता म.गांधी जयंतीचे औचित्य साधून सहयोगी संशोधन संचालक डॉ. भरत वाघमोडे यांच्या नेतृत्वाखाली संशोधन केंद्रात स्वच्छता मोहीम कार्यक्रम राबविण्यात आला. कार्यक्रमाच्या सुरुवातीला म. गांधी आणि माजी प्रधानमंत्री लाल बहादूर शास्त्री यांच्या जयंतीनिमित्त डॉ. भरत वाघमोडे यांनी त्यांच्या प्रतिमेला पुष्पहार अर्पण केल्यावर सर्व शास्त्रज्ञ, अधिकारी व कर्मचार्‍यांनी भारतमातेच्या दोन्ही सुपुत्रांना विनम्र अभिवादन केले.

यावेळी प्रशासकीय कार्यालय, आय.एफ.एस. मॉडेल, संशोधन केंद्राचे प्रक्षेत्र, दोन्ही प्रवेशद्वार परिसरात शास्त्रज्ञ, अधिकारी, कर्मचारी व मजूर यांनी संयुक्तरित्या झाडून स्वच्छ केला. यावेळी प्लास्टिक पिशव्या, पाण्याच्या बॉटल्सची योग्य विल्हेवाट लावण्यात आली. या कार्यक्रमाचे आयोजन डॉ. बाळासाहेब सावंत कोकण कृषी विद्यापीठाचे कुलगुरू डॉ. संजय भावे यांच्या मार्गदर्शनाखाली व विद्यापीठाचे विस्तार शिक्षण संचालक डॉ. पराग हळदणकर यांच्या आदेशानुसार करण्यात आले.