अमृत महोत्सवी वर्षानिमित्त लंगडी स्पर्धा

श्री गणेश विद्यालयाचा डबल धमाका

। मुंबई । प्रतिनिधी ।

सरस्वती मंदिर हायस्कूलसच्या अमृत महोत्सवी वर्षानिमित्त आंतरशालेय लंगडी व खो-खो स्पर्धांचे आयोजन करण्यात आले आहे. माहीमच्या सरस्वती मंदिर हायस्कूल येथे आयोजित आंतरशालेय लंगडी स्पर्धा मोठ्या उत्साहात पार पडली. या स्पर्धेत अनेक शाळांनी सहभाग घेतला आणि अंतिम फेरीत मुलींच्या तसेच मुलांच्या गटात चुरशीचे सामने पाहायला मिळाले.

मुलींच्या अंतिम फेरीत वडाळ्याच्या श्री गणेश विद्यालयाने सरस्वती मंदिर हायस्कूलचा 28-22 असा एक डाव व 6 गुणांनी पराभव केला. सरस्वतीच्या वैदवी बटावले हिने 9 गडी बाद करत उत्कृष्ट आक्रमक खेळाडूचा किताब पटकावला. श्री गणेश विद्यालयाच्या श्रुती मोरे हिने दोन्ही डावांत प्रत्येकी 1:00 मिनिटे संरक्षण करून उत्कृष्ट संरक्षक पुरस्कार जिंकला. तसेच, मनस्वी भूनेसर हिने 4 गडी बाद करत आणि 1:00 मिनिटे संरक्षण करून स्पर्धेची अष्टपैलू खेळाडू होण्याचा बहुमान मिळवला.

मुलांच्या अंतिम फेरीत वडाळाच्या श्री गणेश विद्यालयोने सरस्वती मंदिर हायस्कूलचा 5 मिनिटे राखून 35-34 असा एका गुणाने रोमांचक विजय मिळवला. सरस्वतीच्या शिवम झा याने 3 गडी बाद करत उत्कृष्ट आक्रमक खेळाडूचा पुरस्कार पटकावला. श्री गणेश विद्यालयाच्या अमेय मोहिते याने 1.40 मिनिटे व संरक्षण करून उत्कृष्ट संरक्षक पुरस्कार मिळवला, तर मानस पोस्टरे याने 5 गडी बाद करत आणि उत्कृष्ट संरक्षणाचे योगदान देत स्पर्धेतील अष्टपैलू खेळाडू होण्याचा मान मिळवला.

स्पर्धेचा बक्षीस समारंभ अध्यक्ष केशव कोटणीस, डॉ. आशिष मुळगावकर, बाळ तोरसकर, दौलतराव भोसले मुख्याध्यापक मारुती चाबुकस्वार, उपमुख्याध्यापिका शामल बिनसाळे, कृष्णात जाधव यांच्या हस्ते पार पडला. यावेळी भूषण मर्दे, सुधाकर राऊळ, महेश करमळकर, संकेत डायमा आदी संस्थेकडून उपस्थित होते.