नववर्ष स्वागताचा उत्साह अन् जल्लोष

। अलिबाग । प्रतिनिधी ।

दिवसभर स्वागताची तयारी…उत्कंठा शिगेला पोहोचलेली…क्षणाक्षणाला तरुणांचा वाढता जल्लोष…आकर्षक विद्यूत रोषणाईचा लखलखाट…अशा उत्साही वातावरणात घड्याळातले दोन्ही काटे 12 वर येऊन थांबले आणि सर्वत्र हॅप्पी न्यू इअरचा एकच जल्लोष झाला. नंतर तासभर सुरू होता तो शुभेच्छांचा वर्षाव आणि उत्साहाचा महोत्सव.

2024 या मावळत्या वर्षाला निरोप देत 2025 या नववर्षाचे स्वागत रायगडकरांनी मंगळवारी मध्यरात्री केले. थंडीचा कडाका असतानाही स्वेटर-कानटोपी व अंगावर शाल पांघरून आबालवृद्ध नववर्ष स्वागतात रममाण झाले होते. संगीतमय कार्यक्रम, फटाक्यांची आतषबाजी आणि पाटर्यांनी रात्री उशिरापर्यंत शहरासह समुद्रकिनारे गजबजलेले होते.

तरुण असो की वृद्ध पण बहुतेक सर्वांमध्येच थर्टी फर्स्टची क्रेझ असते. एरवी कधी न घेणारे आपण फक्त थर्टी फर्स्टला घेतो असे अभिमानाने सांगतात. त्यामुळे मंगळवार त्यांचाही दिवस होता. 31 डिसेंबरच्या सकाळपासूनच रात्रीची तयारी सुरू झाली होती. मटन-चिकनच्या दुकानात जशा रांगा होत्या, तशीच गर्दी दारुच्या दुकानातही होती. त्यामुळे या दुकानात काम करणार्‍यांना मंगळवारी अवांतर बोलण्याचीही फुरसत नव्हती. पोलिसांच्या ड्रंक अँड ड्राइव्ह मोहिमेमुळे अलीकडच्या काळात न्यू इअर सेलिब्रेशन घरच्या घरी करण्याचे किंवा कुठेतरी मुक्कामी राहून करण्याचे प्रमाण गेल्या काही वर्षात वाढले आहे. अशा लोकांनी सकाळीच वाइन शॉप गाठून रात्रीची सोय करून ठेवली होती. प्रशासनानेच परवानगी दिलेली असल्याने रात्री उशिरापर्यंत त्यांना अधिकृतपणे व्यवसाय करता येत होता.

नव वर्षाच्या जल्लोषालाठी तरुणाईने समुद्रकिनारी तसेच नाईट पार्ट्यांना पसंती दिली होती. 12 च्या ठोक्याला सर्वत्र एकच जल्लोष झाला. रंगीबेरंगी फटाक्यांनी आकाश उजळून निघाले. ओळखीचा असो वा नसो पण प्रत्येकजण प्रत्येकाला शुभेच्छा देत होता. पोलिस त्यांच्यावर नजर ठेवून होते, पण एकूण उत्साह पाहता त्यांनीही पाश सैल केले होते.

पोलिसांचा कडेकोट बंदोबस्त
चौका-चौकात पोलिस उभे होते. पोलिसांनीही शुभेच्छा देत नागरिकांचे स्वागत केले पण त्याचवेळी दारू पिऊन गाडी चालविणार्‍यांच्या वाट्याला कारवाईचे काटेही आले. नववर्षाच्या स्वागतासाठी कॉलनीतल्या लोकांनी एकत्र येऊन नववर्ष स्वागत करणार्‍यांचे प्रमाणही मोठे होते. या स्वागतात घरच्या गृहिणी अन मुलेही सहभागी झाली होती.

52 जणांना एकदिवसीय परवाना
नव वर्षाच्या स्वागतासाठी अनेक ठिकाणी पार्ट्यांचे आयोजन करण्यात आले होते. रायगड जिल्ह्यात एकदिवसीय दारुविक्रीसाठी 52 जणांनी परवाने घेतले असल्याची माहिती राज्य उत्पादन शुल्क विभागाकडून देण्यात आली होती.

गुडबाय 2024
सरत्या वर्षातील दुःखद गोष्टी विसरून नवीन वर्षाच्या स्वागताचा उत्साह ओसंडून वाहत होता. ग्रामीण भागात मध्यरात्री एक वाजेपर्यंत दारुविक्री करण्याची परवानगी असल्याने मद्यपींनी रात्री उशिरा शहराकडे आपला मोर्चा वळविला. शासनाच्या नियमानूसार शहरात पहाटे पाचपर्यंत दारुविक्री करण्याची परवानगी दिली होती. नववर्षाच्या निमित्ताने काही हॉटेलांमध्ये मनोरंजन कार्यक्रम सुरू होते. सेलिब्रेशनच्या पार्ट्या खर्‍या अर्थाने रात्री आठनंतर सुरू झाल्या. रात्री बारा वाजता समुद्र किनारी हॅप्पी न्यू इयर म्हणत तरुणांनी सरत्या वर्षाला गुडबाय करून येणार्‍या नव वर्षाचे वेलकम करताना हे वर्ष सुखासमाधानात जाण्याच्या शुभेच्छाही एकमेकांना दिल्या.