दहशत पसरवण्यासाठीच सिद्दिकींची हत्या

। मुंबई । प्रतिनिधी ।

माजी राज्यमंत्री बाबा सिद्दिकी यांच्या हत्येप्रकरणी मुंबई पोलिसांनी 4 हजार 590 पानांचे आरोपपत्र दाखल केले आहे. बाबा सिद्धिकी यांची हत्या लॉरेन्स बिष्णोई याचा भाऊ अनमोल बिष्णोई याने दहशत पसरवण्यासाठीच केल्याचे आरोपपत्रात म्हटले आहे. इतकेच नव्हे तर, समाजात भीती आणि वर्चस्व निर्माण करण्यासाठी या हत्येचा कट रचण्यात आल्याचे पोलिसांनी आरोपपत्रात दाखल केले आहे.

निर्मल नगर परिसरात 12 ऑक्टोबर रोजी सिद्दिकी यांच्यावर सहा गोळ्या झाडण्यात आल्या होत्या. त्यापैकी दोन त्यांना लागल्या. या हल्ल्यात ते गंभीर जखमी झाले आणि लीलावती रुग्णालयात उपचार मिळण्याआधीच त्यांचा मृत्यू झाला होता. सिद्दिकी यांच्यावर गोळीबार झाल्यानंतर पोलिसांनी घटनास्थळावरून दोन हल्लेखोरांना अटक केली; तर पुणे, अकोला, उत्तर प्रदेश, राजस्थान, हरयाणा, पंजाब येथून इतर आरोपींची धरपकड करण्यात आली. सिद्दिकी यांच्यावर गोळ्या झाडणारा शूटर शिवकुमार गौतम याला उत्तर प्रदेशातून अटक करण्यात आली होती. एकूण 26 आरोपींना अटक करण्यात आली असून कुख्यात लॉरेन्स बिष्णोईचा भाऊ अनमोल, शुभम लोणकर आणि जिशान अख्तर या तीन फरार आरोपींचा शोध सुरू आहे. आरोपपत्राचा हवाला देणार्‍या या अहवालात अभिनेता सलमान खानशी असलेली बाबा सिद्दिकी यांची जवळीक तसेच अनुज थापनच्या आत्महत्येचा बदला ही गुह्याची इतर कारणे असल्याचे नमूद करण्यात आले आहे. याप्रकरणी मुंबई पोलिसांनी 200 हून अधिक साक्षीदारांचे जबाब नोंदवले आहेत.