बोरघाटात भरधाव ट्रकची पाच वाहनांना धडक; दोघांचा जागीच मृत्यू

| खोपोली | वार्ताहर |

खंडाळा बोर घाटात जुन्या मुंबई – पुणे महामार्गावर भीषण अपघाताची घटना घडली आहे. भरधाव ट्रकने पाच वाहनांना जोरदार धडक दिल्याने एका बाप – लेकीचा दुर्दैवी मृत्यू झाला. तर बारा जण जखमी झाले आहेत. रविवारी (दि.20) रात्रीच्या सुमारास हा अपघात झाला आहे. जखमींपैकी 4 जणांना गंभीर दुखापती झाल्या असून, त्यांना पुढील उपचासाठी पनवेल, खोपोली, लोणावळा येथील रूग्णालयात दाखल करण्यात आले आहे. हा अपघात रविवारी रात्री अमृताजंन पुलाजवळ झाला.

मिळालेल्या माहितीनुसार, तीव्र उतारावार एका ट्रकचे नियंत्रण सुटले आणि एकापाठोपाठ पाच वाहनांना धडक दिली. यात बाप- लेकीचा मृत्यू झाला असून, 12 जण गंभीर जखमी झाले आहेत. घाटरस्त्यावरील तीव्र उतार आणि ट्रकच्या अति वेगामुळे हा अपघात घडल्याचा प्राथमिक अंदाज पोलिसांनी व्यक्त केला आहे. बोर घाटात झालेल्या अपघातामुळे काही काळ वाहतूक पूर्णपणे ठप्प झाली होती. यामुळे प्रवाशांना मोठा त्रास सहन करावा लागला. पोलिसांनी तातडीने घटनास्थळी धाव घेत अपघातग्रस्त वाहने बाजूला काढली आणि वाहतूक पूर्वपदावर आणली.

जखमींना पनवेल, खोपोली आणि लोणावळा येथील रुग्णालयांमध्ये उपचारासाठी दाखल केले. गंभीर जखमींवर अतिदक्षता विभागात उपचार सुरू आहेत. ट्रक चालक घटनास्थळावरून पसार झाला असून, त्याच्याविरोधात गुन्हा दाखल करण्यात आला आहे. पोलिसांनी वाहन चालकाचा शोध घेण्यासाठी सीसीटीव्ही फुटेज तपासण्यास सुरुवात केली आहे. या अपघाताने बोर घाटातील रस्त्याच्या सुरक्षिततेवर पुन्हा प्रश्नचिन्ह उपस्थित केले आहेत.